Jeshi la Ulinzi la Rwanda (RDF) limejitenga na taarifa ya uongo inayoenezwa mtandaoni ikidai kuwa Rais Paul Kagame ni mgonjwa mahututi.
Tangu usiku wa Jumatatu, tarehe 23 Juni, taarifa hiyo feki imekuwa ikisambaa sana kwenye mitandao ya kijamii.
Taarifa hiyo ya kughushi inadai kwamba Rais Kagame anaumwa sana, hali yake ni mbaya, na anahudumiwa na madaktari bingwa.
Pia inatoa wito kwa Warwanda na wale wanaoitwa “marafiki wa Rwanda” kuwa wamoja na kumuombea Rais wa Jamhuri.
Taarifa hiyo inahimiza wananchi kutulia, ikisisitiza kuwa taasisi za taifa zinaendelea kufanya kazi, na RDF imejikita katika kulinda amani na usalama wa nchi.
Kupitia ukurasa wake rasmi wa X, RDF ilitangaza kwamba ujumbe huo na maudhui yake ni habari za uongo (Fake News).
Jeshi la Rwanda lilikemea vikali uvumi huu, ambao umekuwa ukienezwa kwa siku kadhaa na watu wanaojulikana kupinga serikali ya Rwanda, hasa kuhusu hali ya kiafya ya Rais Kagame.
