Sosiyete sivile yo muri Kasaï-Oriental izwi nka Nouvelle Société Civile Congolaise (NSCC), kuri uyu wa Kabiri ushize yashinje Joseph Kabila, wahoze ari Perezida wa Repubulika ya Demokarasi ya Congo gufatira diyama y’uwitwa Théodore Mbiya Kalala, ingana na carats 822 yabonetse muri Bena Ciswaka mu 2005 ifite agaciro ka miliyari y’amadolari ku isoko.
Iyi sosiyete sivile ni yo yemeza ko iri buye ry’agaciro rishobora kugura agera kuri miliyari 1 y’amadolari (1.000.000.000 $).
Inyandiko yashyizwe ahagaragara na NSCC igira iti “ Iryo buye ry’agaciro ryafatiriwe n’umuyobozi wo hejuru kurusha abandi w’igihugu mu gihe cy’ubutegetsi bwahise, Perezida w’icyubahiro Joseph Kabila Kabange. Hagendewe ku gaciro ku isoko k’iyo diyama ka miliyari y’amadorali, ni umutungo ushobora gukoreshwa mu gushyira mu bikorwa imishinga minini y’igihugu cyacu muri rusange n’intara yacu dukunda by’umwihariko…”
Nk’uko tubikesha 7sur7.cd, NSCC irateganya guhamagaza ikiganiro n’abanyamakuru kuri uyu wa gatanu, kizagaruka kuri iki kibazo, ikba ihamagarira abaturage bose kuzabigiramo uruhare hakareba uko iryo buye Kabila yarisubiza.
Muri Kanama 2020, ubwo yari akiri ku butegetsi, Théodore Mbiya Kalala, yari yatanze ikirego mu Rukiko Rusesa Imanza arega Joseph Kabila, amushinja kuba yarakoresheje ububasha bwe akariganya iyo diyama yabonetse mu bucukuzi bw’amabuye y’agaciro bwatewe inkunga n’amafaranga ye. Kuva icyo gihe ariko nta cyakozwe ngo ashyikirizwe urukiko yiregure.
