Kituo cha Kitaifa cha Hali ya Hewa cha Umoja wa Falme za Kiarabu (UAE) kimetangaza kuwa Jumamosi, nchi hiyo ilifikia kiwango cha juu cha joto cha 51.6°C — ikiweka rekodi mpya kwa siku ya pili mfululizo katika mwezi huu wa Mei.
Taarifa hiyo ilichapishwa kwenye mtandao wa X, ikieleza kuwa joto la Jumamosi liliongezeka kwa 1.2°C ikilinganishwa na joto lililorekodiwa Ijumaa huko Abu Dhabi.
“Joto la juu kabisa lililorekodiwa nchini kwa wakati huu ni 51.6°C huko Sweihan (Al Ain) saa 7:45 mchana kwa saa za UAE (0945 GMT),” limesema shirika hilo.
Ofisi ya hali ya hewa imethibitisha kuwa viwango hivi vya joto vimevunja rekodi ya awali ya mwezi Mei ya 50.2°C iliyowekwa mwaka 2009.
Nchi hii ya jangwani — moja ya wauzaji wakuu wa mafuta duniani — ni mojawapo ya maeneo yenye joto kali zaidi duniani na iko katika hatari kubwa kutokana na mabadiliko ya tabianchi.
Wanasayansi wanasema kuwa hali hii ya joto la kupindukia ni ishara dhahiri ya ongezeko la joto duniani, na kwamba hali kama hizi zitazidi kujirudia, kuwa kali zaidi na kudumu kwa muda mrefu zaidi.
Idadi ya siku za joto kali duniani imeongezeka karibu mara mbili katika kipindi cha miaka 30 iliyopita. Utafiti wa Greenpeace wa mwaka 2022 ulionyesha kuwa eneo la Mashariki ya Kati linakumbwa na hatari kubwa ya ukosefu wa maji, uhaba wa chakula, na joto kali kutokana na mabadiliko ya tabianchi.
