Justin Bitakwira wigeze guhagararira ishyaka UNC mu nteko ishinga amategeko ya Repubulika ya Demukarasi ya Congo (RDC) akaba na Minisitiri wari ushinzwe iterambere ry’icyaro, ahamya ko ibihano aherutse gufatirwa na komisiyo y’umuryango w’ubumwe bw’Uburayi nta ngaruka na nke bizamugiraho.
Mu ntangiriro z’Ukuboza 2022 ni bwo komisiyo ya EU yafatiye ibihano Bitakwira hamwe n’abandi bantu 7, bashinjwa kugira uruhare mu mutekano muke uri mu burasirazuba bwa RDC.
Komisiyo ya EU yashinje Bitakwira gukwirakwiza imvugo z’urwango n’amagambo ahamagarira Abanyekongo gukorera ubugizi bwa nabi bagenzi babo bo mu bwoko bw’Abanyamulenge, imufatira icyemezo cyo kudakorera ingendo mu bihugu bigize uyu muryango, hamwe no gufatira imitungo yaba afiteyo.
Uyu munyapolitiki mu kiganiro yagiriye ku muyoboro wa RTGA World, yagaragaje ko komisiyo ya EU ijya kumufatira ibihano, yamwibeshyeho, itekereza ko aba ku mugabane w’Uburayi, afite inzu kuri uyu mugabane, ariko ngo si ko biri.
Bitakwira yagize ati: “Ubumwe bw’Uburayi butekereza ko ntuye i Burayi. Njyewe mba ku ivuko hamwe na nyogokuru. Butekereza ko mfite inzu i Burayi, ariko nta yo mfite. Nta n’urushinge mfiteyo rwo kudoda imyenda yanjye mu gihe yaba yacitse.”
Kuri uru rutonde rw’abafatiwe ibihano hariho abandi nk’Umuvugizi wa M23 ku rwego rw’igisirikare, Major Willy Ngoma, Colonel Ruhinda uyobora umutwe wihariye wa FDLR/FOCA, William Yakutumba washinze Mai Mai Yakutumba, Désiré Londroma Ndjukpa washinze CODECO, Meddie Nkalubo uyobora ADF, Colonel Joseph Nganzo Olikwa wo mu gisirikare cya Leta n’umushoramari w’Umubiligi witwa Alain Goetz.
