Rutahizamu w’Ikipe y’Igihugu ‘Amavubi’, Meddie Kagere, yafashije Simba Sports Club kubona amanota atatu ya mbere muri shampiyona ya Tanzania nyuma yo gutsinda Dodoma Jiji igitego 1-0.
Simba yari yasuye Dodoma mu mukino w’umunsi wa kabiri wa shampiyona.
Igitego cya Kagere cyo ku munota wa 70 w’umukino ni cyo cyafashije Simba gukura amanota atatu mu mujyi wa Dodoma.
Kagere watsindaga igitego cye cya mbere muri uyu mwaka w’imikino, yinjiye mu kibuga asimbura Yusufu Valentine Mhilu mbere yo gufungura amazamu ku mupira yari ahawe n’umutwe n’Umukongomani Chrispain Mugalu.
Dodoma Jiji yari yihagazeho mu gice cya mbere, yaje kugira ikibazo mu gice cya kabiri ubwo Jabir Anwar yerekwaga ikarita itukura yo ku munota wa 45 azira ikosa yari yakoreye kuri Kennedy Juma Wilson.
Gutsinda uyu mukino byatumye Simba SC igira amanota ane kuri atandatu, kuko yanganyije na Biashara United tariki 28 Nzeri 2021 mu mukino ufungura shampiyona y’umwaka w’imikino 2021-2022.
