Ikipe y’igihugu ya Uganda, isubiriye Amavubi y’u Rwanda, iyatsinda ikindi gitego kimwe ku busa (1-0) mu mukino wabereye kuri sitade Saint Mary iri i Kitende mu mujyi wa Kampala.
Iki gitego cyatsinzwe na Fahad Bayo Aziz ku munota wa 22 w’umukino. Uyu ni na we watsinze igitego kimwe iyi kipe ya Uganda yatsindiye Amavubi i Kigali tariki ya 7 Ukwakira 2021.
Amavubi nyuma yo gutsindirwa i Kampala, agumye ku mwanya wa nyuma mu itsinda E aherereyemo n’inota rimwe. Uganda iri ku mwanya wa kabiri n’amanota 8, Mali ni yo iyoboye n’amanota 10, mu gihe Kenya iri ku mwanya wa gatatu n’amanota abiri.
Iyi mikino igize ijonjora ryo gushaka itike y’irushanwa ry’igikombe cy’Isi rizabera muri Qatar mu 2022.
