Abaturage bo mu mudugudu wa Karambo, akagari ka Kabaya umurenge wa Murundi, akarere ka Karongi ho mu Ntara y’i Burengerazuba, barasaba Leta gukora ubushakashatsi hakamenyekana icyaba kirimo kubakururira ibiza batari barigeze babona muri ako gace.
Aba baturage bavuga ko umusozi witse inzu ziramenagurika, inkangu ziramanuka zisenya inzu zabo, bavuga ko ari ibintu babonye bwa mbere muri ako gace, by’umwihariko ko hakozwe ubushakashatsi, byabafasha bakamenya niba koko nta kintu bazongera kuhakorera.
Umwe muri aba baturage aganira na VOA, yagize ati “Ubundi imvura yaraguye, tugiye kubona, tubona hano umusozi uritse, umaze kwika tubona inzu ziramenaguritse, noneho rero impungenge twagize ni uko umusozi witse bigahinguka ku wundi musozi uri hirya iriya”.
Aba baturage bavuga ko bafite impungenge, ati “Dufite impungenge ko hasi aha mu butaka haba harimo ikibazo gituma aya mazu agenda arigita, si ukuvuga ngo umusozi watengutse, ahubwo birimo kugenda byika bijya hasi”.
Undi ati “biduteye ubwoba rwose, ibintu byo kugirango ubutaka bucikemo kabiri hadahanamye urumva byoroshye, bigira gutya bikika, na hariya mu bishyimbo harimo imikate”.
Barasaba Leta gukora ubushakashatsi
Ati “Twebwe ikintu twifuza rero, twifuzaga niba hari ububasha bw’ubutekinisiye buhari, byibura bagapima bakamenya niba haba hari ikibazo kiri hasi kibitera, bakatubwira bati ‘aha ntihemewe, nta muntu wemerewe kuhatura, tukabimenya”.
Undi “Impamvu irimo gutera ibi bintu ntayo tuzi, mbese hakozwe ubushakashatsi byaba byiza cyane, naho ubundi kuba ibintu babirebera gusa nta bashakashatsi bari bagera hano; ntabwo bihagije”.
Muri uyu murenge bamwe mu baturage bategetswe kwimuka, bacumbitse mu baturanyi babo, bimutse aho ubuyobozi bubona ko hateza ubuzima bwabo kujya mu kaga.
Ubwo Minisitiri w’Intebe, Dr Ngirente Edouard, yasuraga abaturage b’aka karere ku wa Kabiri tariki ya 8 Gicurasi 2018, yabasabye korohereza Leta mu gihe basabwa kuva mu manegeka, bakajya gutura ahateganyijwe hatabateza ikibazo ndetse binorohera Leta kubagezaho ibikorwaremezo.
Minisitiri w’Intebe, yabijeje ko Leta y’u Rwanda izakomeza kubaba hafi muri ibi bihe bikomeye nyuma yo kugirwaho ingaruka n’ibiza.
Minisiteri Ishinzwe Imicungire y’Impunzi n’Ibiza (MIDIMAR) itangaza ko abamaze guhitanwa n’ibiza muri uyu mwaka mu gihugu hose basaga 200, imibare ya nyayo ikaba itaratangazwa mu gihe hagikusanywa amakuru.
Kanda kuri SUBSCRIBE ujye ubona ibiganiro n’indirimbo bishya
