Umunyapolitiki Moïse Katumbi utavuga rumwe n’ubutegetsi bwa Repubulika Iharanira Demokarasi ya Congo, yamaganye za miliyoni z’amadorali Leta y’iki gihugu ikomeje gushora mu makipe yo ku mugabane w’u Burayi, avuga ko ari igitutsi ku banye-Congo basanzwe babayeho mu buzima bubi.
Kinshasa biciye muri Minisiteri ya Siporo ndetse n’iy’Ubukerarugendo, yasinyanye amasezerano y’imikoranire n’amakipe ya AS Monaco yo mu Bufaransa ndetse na AC Milan yo mu Butaliyani, ndetse iri mu nzira zo gusinyana amasezerano nk’aya na FC Barcelona yo muri Espagne.
Ni amasezerano yiswe ayo kumenyekanisha kiriya gihugu, bikaba bivugwa go afite agaciro k’arenga $ miliyoni 43.
Nyuma yo gusinya ariya masezerano, abenshi mu banye-Congo bakomeje kunenga Leta y’igihugu cyabo ku bwo guha amakipe y’i Burayi ariya mafaranga, nyamara babayeho nabi.
Abamaganye aya masezerano barimo Katumbi unasanzwe ari nyiri ikipe y’umupira w’amaguru ya Tout Puissant Mazembe.
Mu ibaruwa yandikiye Tshisekedi, yavuze ko gahunda Guverinoma yafashe yo gukorana n’ariya makipe ari “icyemezo cyo kutita ku nshingano kandi kitemewe”.
Yavuze ko mu gihe abanye-Congo barenga miliyoni 7 bavuye mu byabo bakaba babayeho mu buzima bubi cyane na ho abandi babarirwa muri miliyoni 25 bakaba bugarijwe n’inzara, kuba leta ihitamo guha amafaranga abanyaburayi bisa n’ubushotoranyi.
Yunzemo ati: “Mu gihe muteganya gushyira izina Congo ku myambaro y’amakipe y’i Burayi, abana bacu barimo bicwa n’inzara, abasirikare bacu bararinda igihugu ku mafaranga ari munsi y’amadorali 5 ku munsi, amashuri yacu ari guhinduka amatongo.”
Katumbi kandi yagaragaje ko RDC itakabaye ishora ziriya miliyoni mu makipe asanzwe akize, nyamara shampiyona ya RDC yarabuze n’uwayitera inkunga ya $ 600,000 kugira ngo isozwe.
Yabajije Tshisekedi ati: “Ese umubyeyi ashobora kugaburira abana b’ahandi kandi abe bashonje?”
Ku bwa Moïse Katumbi, amafaranga Leta ya Kinshasa yashoye i Burayi ngo yakabaye afasha abanye-Congo kubona uburezi, ubuvuzi, icyubahiro ndetse n’amahoro.
Yamusabye kandi kwisubira ku cyemezo cyo gukorana n’ariya makipe, ahubwo agashyira imbere inyungu z’abaturage ba Congo.
One Response
ariko buriya Cyirombo abona abanyamahanga bakeneye iki kuri Kongo? niba ushinzwe zumutekano akubitwa nabaturage, ubwo umuturage we afite uwuhe mitekano?
cyakora amakipe yemera ko izina Kongo rijya ku myenda yazo nayo ntibazi ibyo barimo?