Umuryango Mpuzamahanga uharanira Uburenganzira bwa Muntu, Amnesty International, wasabye Guverinoma ya Kenya kutazakora ikosa ryo gucyura umudepite wo muri Tanzania, Gogbless Lema, wahunze igihugu, kuko ashobora kugirirwa nabi.
Amnesty International ivuga ko Guverinoma ya Kenya ifite inshingano zo guvumbikira umuntu wese uhunga akaga mu gihugu cye kandi ko kuri Lema ashobora kugirirwa nabi mu gihe yasubizwa iwabo muri Tanzania ku ngufu.
Umuyobozi wa Amnesty International muri Kenya, Ilungu Houghton yagize ati: “Kenya ntikwiye kurenga ku mahame mpuzamahanga yemejwe yo kudasubizwa iwabo ku ngufu,”
Yakomeje avuga ko amahame mpuzamahanga ashimangirwa n’amategeko y’igihugu. Aya mategeko ngo abuza Kenya kwirukanira abantu ku mupaka cyangwa kubasubiza mu gihugu bashobora kujya mu kaga ko kugirirwa nabi.
Iyi nkuru dukesha The East African irasoza ivuga ko Hon. Lema, wari uhagarariye Arusha mu nteko ishinga amategeko, yatawe muri yombi kuri iki Cyumweru gishize amaze kwinjira muri Kenya ahitwa Kajiado, mu birometero nka 80 mu majyepfo ya Nairobi.
Yari yiyamamarije indi manda ku iturufu y’ishyaka Chadema ariko ntiyabasha kongera gutsinda. Umwunganizi we mu mategeko, George Wajackoyah, kuri iki Cyumweru yari yatangaje ko uyu munyapolitiki agiye gusaba ubuhungiro muri Kenya.
