Jumamosi hii, Rais wa Korea Kaskazini, Kim Jong-un, alikutana na Waziri wa Mambo ya Nje wa Urusi, Sergey Lavrov, ambaye yuko ziarani rasmi nchini humo.
Mkutano huo ulifanyika katika jiji la Wonsan, kama ilivyotangazwa na Wizara ya Mambo ya Nje ya Urusi.
Picha iliyochapishwa kwenye ukurasa rasmi wa X (zamani Twitter) wa Wizara inaonyesha viongozi hao wawili wakipeana mikono kwa furaha huku wakitabasamu.
Ziara ya Lavrov inajiri wakati ambapo Moscow na Pyongyang wanaimarisha uhusiano wao wa kirafiki.
Korea Kaskazini ni miongoni mwa nchi chache zinazoonyesha wazi kuunga mkono vita vya Urusi dhidi ya Ukraine, ambavyo vinaendelea kwa mwaka wa nne sasa. Pyongyang imeripotiwa kutuma maelfu ya wanajeshi na silaha, zilizosaidia vikosi vya Urusi kuwasukuma nyuma majeshi ya Ukraine katika eneo la Kursk.
Ujasusi wa kijeshi wa Uingereza unaripoti kuwa takriban wanajeshi 6,000 wa Korea Kaskazini wameuawa katika vita hivyo.
Wakati huo huo, ujasusi wa kijeshi wa Korea Kusini unaamini kuwa Korea Kaskazini huenda inajiandaa kutuma wanajeshi zaidi nchini Ukraine kati ya Julai na Agosti mwaka huu.
Kabla ya kukutana na Rais Kim, Lavrov alikutana na Waziri wa Mambo ya Nje wa Korea Kaskazini, Son Hui.
Lavrov alishukuru uongozi wa Korea Kaskazini kwa kupeleka “wanajeshi wenye ujuzi wa hali ya juu wa kivita” kusaidia Urusi katika kurejesha maeneo yake.
Korea Kaskazini imethibitisha tena kuwa itaendelea kuiunga mkono Urusi katika vita hivyo.
