Abantu umunani barimo umuhanzi Ruhunuriza James uzwi mu muziki nyarwanda nka King James na Mbabazi Shadia uzwi nka Shaddyboo ku mbuga nkoranyambaga, batawe muri yombi na Polisi y’Igihugu ikorera mu ntara y’Iburengerazuba nyuma yo gufatwa barenze ku mabwiriza yo kwirinda COVID-19.
Umuvugizi wa Polisi y’Igihugu mu ntara y’Iburengerazuba, CIP Bonaventure Twizere Karekezi, yavuze ko aba bantu batawe muri yombi ejo ku wa Kane tariki ya 29 Nyakanga bafatiwe mu murenge wa Boneza mu karere ka Rutsiro.
Ati: “Batawe muri yombi ari abantu umunani kubera ko barenze ku mabwiriza yo kwirinda icyorezo cya COVID 19. Batawe muri yombi tariki 29 z’ukwa Karindwi bari hariya ku kiyaga cya Kivu mu murenge wa Boneza.”
CIP Karekezi yunzemo ko mu batawe muri yombi “harimo uzwi ku izina rya King James ndetse n’undi uzwi ku izina rya Shaddy Boo, igikurikiraho ni uko bahanwa.”
King James, Shaddyboo na bagenzi babo bahise bajya gufungirwa kuri sitasiyo ya polisi ya Gihango mu karere ka Rutsiro.
Bafatiwe i Rutsiro mu gihe kariya karere kari mu turere tumaze iminsi muri gahunda ya Guma Rugo, kubera ubwinshi bw’abanduye icyorezo cya COVID-19 bakagaragayemo.
