Kinshasa yamaganye iyicwa ry’Umunyekongo wishwe n’umupolisi w’umuzungu muri Michigan

Repubulika ya Demokarasi ya Congo yamaganye iraswa n’iyicwa ry’umwimukira w’Umunyekongo wishwe n’umupolisi w’umuzungu muri Leta ya Michigan, muri Leta Zunze Ubumwe za Amerika mu byumweru hafi bibiri bishize, nk’uko bigaragara mu nyandikomvugo y’inama ya guverinoma yagaragaye kuri uyu wa Gatandatu, itariki 16 Mata 2022.

Patrick Lyoya, w’imyaka 26, bivugwa ko umuryango we wimukiye muri Amerika mu 2014 ubwo bahungaga intambara muri Repubulika ya Demokarasi ya Congo, yiciwe mu muhanda mu gace ka Grand Rapids, muri Leta ya Michigan ku ya 4 Mata arashwe mu mutwe n’umupolisi w’umuzungu wari umaze kumuhagarika ari mu modoka.

Uyu Munyekongo akaba yiyongereye ku bandi birabura bo muri Amerika bamaze kwicwa n’abapolisi b’abazungu mu buryo nk’ubu, ndetse urupfu rwe rukaba rwarateje imyigaragambyo y’abasaba amavugurura mu gipolisi.

Patrick Lyoya wishwe na polisi

Ibiro Ntaramakuru by’Abafaransa (AFP) dukesha iyi nkuru, bivuga ko kuwa Gatanu ushize, mu nama ya guverinoma, Minisitiri w’Intebe wa Congo, Jean-Michel Sama Lukonde, “yamaganye ubwicanyi bwa kigwari bwakozwe n’umupolisi w’umuzungu muri Leta Zunze Ubumwe za Amerika abukoreye umuturage ukomoka mu gihugu cya Congo, Patrick Lyoya, utari ufite intwaro, mu gihe yahagarikwaga ku muhanda” nk’uko inyandikomvugo y’inama ivuga.

Yavuze ko Ambasaderi wa Leta Zunze Ubumwe za Amerika muri DR Congo yagaragaje “kwicuza cyane ndetse n’akababaro ka guverinoma ye nyuma y’iki gikorwa kibi.”