Ikigo cya Koreya y’Epfo gishinzwe guhangana n’indwara, KDCA, ku wa 15 Gashyantare 2021 cyatangaje ko abantu barengeje imyaka 65 y’amavuko, bazahabwa urukingo rwa Covid-19 inyuma y’ibyiciro bitatu.
Nk’uko byemejwe n’Umuyobozi Mukuru wa KDCA, Jeong Eun-kyeong mu nkuru y’igitangazamakuru The Strait Times, igikorwa cyo gukingira abaturage muri Koreya y’Epfo kizatangira tariki ya 26 Gashyantare 2021, aho abantu 272,000 bari munsi y’iyi myaka ari bo bazaherwaho mu cyiciro cya mbere.
Guhera tariki ya 8 Werurwe 2021, hazatangwa izindi nkingo ku cyiciro cya kabiri cy’abantu 354,000 barimo abafite ibyago byinshi byo kwandura iki cyorezo, cyane cyane abakozi bo mu bitaro.
Guhera tariki ya 22 Werurwe 2021, hazakurikiraho icyiciro cy’abantu 78,000 bifatanyije na Leta mu rugamba rwo kurwanya iki cyorezo barimo n’abashakashatsi.
Jeong yatangaje ko abarengeje imyaka 65 y’amavuko bo bazakingirwa muri bibiri bya kane (2/4 ) by’uyu mwaka, ubwo hazaba habonetse izindi nkingo z’ubwoko bwa Astra Zeneca iki gihugu kigiye kwifashisha.
Koreya y’Epfo yafashe iki cyemezo idashingiye ku bushakashatsi bwa siyansi, bwerekana ko abantu bari mu zabukuru ari bo bakunze kuzahazwa cyane n’icyorezo cya Covid-19, abenshi muri bo kikanabahitana.
Kurikira amakuru n’ibiganiro kuri Bwiza TV, ukanze hano
