Kuri iki cyumweru, Koreya ya Ruguru yakoze igeragezwa rya misile nini kuva mu 2017, yohereza mu kirere misile yo mu bwoko bwa “intermediate-range ballistic missile”, iraswa mu ntera y’ibirometero hagati ya 3,500 na 5500, bigaragara ko yenda kubura kugerageza misile ziraswa kure.
Abayobozi bakuru b’ingabo za Koreya y’Epfo batangaje ko iki gisasu cya misile kimwe cya ballistique cyarashwe ahagana mu ma saa moya n’iminota 52 za mu gitondo (2252 GMT) kiva mu Ntara ya Jagang yo muri Koreya ya Ruguru cyerekeza ku nyanja iri ku nkombe y’iburasirazuba.
Akanama k’igihugu gashinzwe umutekano muri Koreya y’Epfo (NSC), kateranye mu nama y’igitaraganya idasanzwe iyobowe na Perezida Moon Jae-in, kavuze ko iri geragezwa rya misile yo mu bwoko bwa intermediate-range ballistic missile (IRBM), Koreya ya Ruguru itariherukaga kuva mu 2017 nk’uko iyi nkuru dukesha France24 ivuga.
Moon yavuze ko iri gerageza rya Koreya ya Ruguru ari indi ntambwe iganisha gukuraho burundu ihagarikwa ry’igeragezwa ry’ibisasu bya misile biraswa mu ntera ndende cyangwa byambukiranya imigabane byo mu bwoko bwa intercontinental ballistic missiles (ICBMs).
Yavuze ko urukurikirane rw’igerageza rya misile Koreya ya Ruguru yakoze muri uku kwezi byibukije umwuka mubi watutumbye mu 2017, ubwo iki gihugu cyageragezaga ibisasu bya kirimbuzi byinshi ikanarasa misile nini, harimo na zimwe zanyuze hejuru y’u Buyapani.
Umuyobozi wa Koreya ya Ruguru, Kim Jong Un, yatangaje ko batakitaye kuri iryo buza ry’agateganyo ry’igerageza ry’intwaro za kirimbuzi ryatangajwe mu mwaka wa 2018 mu nyuma y’inama yamuhuje na Perezida Donald Trump.
