Koreya ya Ruguru yatangaje ko yagerageje ubwoko bubiri bwa misile zo mu bwoko bwa cruise zishobora kuraswa mu mazi, mu nyanja iri mu burasirazuba bw’igihugu.
Igerageza ryakozwe ku wa Gatatu, tariki ya 14 Ukwakira 2026, rigamije kugenzura ubushobozi bw’intwaro zayo zo gukumira ibitero no kongerera ingabo zirwanira mu mazi ubushobozi bwo gukora ibikorwa bya gisirikare by’ingenzi.
Ibi byatangajwe n’itangazamakuru rya Leta ya Koreya ya Ruguru, KCNA, nk’uko Al Jazeera na Reuters babitangaje.
Imwe muri misile zageragejwe ni Pulhwasal-3-31, isanzwe izwi kuko Koreya ya Ruguru iherutse gutangaza ko yayigerageje.
Igerageza ryakurikiranywe n’abayobozi bakuru mu gisirikare. KCNA yavuze ko ritagize ingaruka mbi ku mutekano w’ibihugu bituranyi.
Nubwo iki gihugu gikomeje guteza imbere intwaro zacyo, ntikiramenyekana ko gifite ubwato bugezweho bw’intambara bwo mu mazi bushobora kurasa misile kandi bukaba bukoreshwa mu buryo bwuzuye.
Umuyobozi wacyo, Kim Jong Un, yashyize imbere guteza imbere ubwo bwato n’izindi ntwaro zifite ubushobozi bwo kuraswa kure.
Igerageza rije rikurikira ibindi bikorwa bya gisirikare byakozwe mu byumweru bishize, birimo kurasa misile za ballistique no kugerageza misile zifite umuvuduko urenze cyane uw’ijwi.