Ku mbuga zitandukanye muri Repubulika ya Demukarasi ya Congo, hasakaye ibaruwa bigaragara ko hari abasirikare n’abapolisi baba baherutse kwandikira Perezida Félix Tshisekedi uyobora iki gihugu, bagaragaza agahinda batewe no guhembwa umushahara muke.
Iyi baruwa bitagaragara itariki yandikiweho, ifite umutwe ugira uti: “Manifeste du Militaire Congolais”. Mu Kinyarwanda bishatse kuvuga ngo: “Inyandiko y’Igisirikare cya Congo”
Bigaragara ko yandikiwe Perezida wa RDC akaba n’Umugaba w’Ingabo w’Ikirenga, hisunzwe ingingo nk’iyo mu Itegekonshinga ry’iki gihugu yo ku wa 18/02/2006 na N? 13/005 yo ku wa 15/01/2013, kopi zayo zihabwa abarimo: Perezida wa Sena, umuyobozi w’urwego rw’iperereza rwa gisirikare, uw’igisirikare, uw’igipolisi n’abandi.
Itangira igira iti: “Guca intege igisirikare ni nko kwicukurira imva. Kwirengagiza igisirikare ni nko kugenda wambaye ubusa mu ishyamba ry’amahwa. Gucamo ibice igisirikare ni ugucamo ibice igihugu, kudahemba abasirikare umushahara mwiza ni nko gucumbikira intare ishonje mu cyumba cyawe.”
Mu ibaruwa, abayanditse bagaragaza urugamba abasirikare bakomeje kurwana, bagerageza kugarura “umutekano wabuze bitewe n’abanyapolitiki babifitemo inyungu.” Abo ngo “binjiza amafaranga menshi arenga amadolari y’Amerika 13,000, mu gihe umusirikare yinjiza amafaranga ya RDC 170,000”, kandi ibiciro by’ibicuruzwa n’agaciro k’idolari byarazamutse.
Abasirikare ba RDC baheruka kongezwa umushahara muri Mutarama 2020. Icyo gihe muri rusange, igisirikare cyose cyongereweho miliyari 2,792,146,500 z’amafaranga akoreshwa muri iki gihugu (FC). Umusirikare muto umwe yongejwe amafaranga 16,500 FC ku mushahara asanzwe ahembwa, akuwe ku ukabakaba 155,000 FC.
