Iyi ni imibare yashyizwe hanze n’ishyirahamwe riharanira uburenganzira bw’ikiremwamuntu mu Burundi (Ligue ITEKA), rivuga ko kuva muri Mata 2015 kugeza 23 Mata 2017, Abarundi 1193 bishwe, abagera kuri 424 baburirwa irengero mu gihe abagera kuri 272 bahohotewe.
Abarundi batavuga rumwe n’ishyaka CNDD FDD riri ku butegetsi, ndetse n’imiryango itabogamiye kuri Leta, ku wa 26 Mata 2017, nibwo bibukaga aba bishwe, itariki imyigaragambyo yatangiriyeho mu Burundi mu 2015, abaturage bamagana manda ya 3 ya Perezida Nkurunziza.
Iri shyirahamwe Ligue ITEKA, rivuga ko kugeza muri uyu mwaka wa 2017, abantu 4573 aribo bagiye batabwa muri yombi n’inzego z’umutekano za Leta, 223 muri bo bagiye babonwa nyuma bapfuye mu gihe abagera kuri 1328 bakomeretse.
Mu gihugu hose, bitangazwa ko hari ibyobo 14 byahambwemo abantu bagiye bicwa mu buryo butandukanye, abahambwe muri ibi byobo bagiye bashinjwa Leta y’u Burundi mu gihe yo ihakana ko ibyo byobo nta byo.
[xyz-ihs snippet=”google-pub”]
Imyigaragambyo yakurikiwe n’ubwicanyi yatangiye muri Mata 2015, nyuma yaho ishyaka CNDD FDD ritangiye perezida Nkurunziza nk’umukandida uzarihagararira mu matora, bamwe bavuga ko bikozwe bihabanye n’ibikubiye mu Itegeko Nshinga ry’u Burundi.
Perezida Nkurunziza yariyamamaje aratsinda mu matora, akomeje kuyobora u Burundi, ubu hakaba hakurikiyeho ingingo irimo kwigwaho yo guhindura Itegeko Nshinga akaba yahabwa andi mahirwe mu 2020, akongera kwiyamamaza.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Théoneste/Bwiza.com
