Wanasayansi wa Uingereza wanasema kwamba baadhi ya watu wanaweza kujihisi kuchukizwa au kupata matatizo kiafya baada ya tendo la ndoa, kutokana na vijidudu au protini zinazopatikana kwenye shahawa ya mwanaume, hali ambayo inaweza kusababisha maumivu makali, uvimbe kwenye sehemu za siri, au hata kupumua kwa shida.
Hali hii inaitwa Hypersensitivity kwa Plasma ya Shahawa. Ilitambulika kwa mara ya kwanza mwaka 1967, lakini kwa mujibu wa wataalam kama Dkt. Michael Carroll, mhadhiri katika Chuo Kikuu cha Manchester Metropolitan, hali hii huenda inawaathiri watu wengi zaidi kuliko ilivyodhaniwa hapo awali.
Dkt. Carroll anasema dalili zake mara nyingi huchanganywa na magonjwa ya zinaa au maambukizi ya kawaida. Hata hivyo, ikiwa mwanamke anatumia kondomu, dalili hizo hazijitokezi—kitu kinachoashiria uwezekano wa kuwa ni aleji dhidi ya shahawa.
Ingawa hapo awali ilionekana kuwa ni hali ya nadra, utafiti wa mwaka 1997 ulionyesha kuwa asilimia zaidi ya 12 ya wanawake waliokuwa na dalili baada ya ngono huenda walikuwa na tatizo hilo.
Kwa sasa, hali hii inaonekana zaidi kwa wanawake wa kati ya miaka 20 hadi 59, lakini pia wanaume wanaweza kuathirika kwa hali inayoitwa Post-Orgasmic Illness Syndrome (POIS), ambapo hushuhudia maumivu ya kichwa, uchungu wa misuli, au maumivu tumboni baada ya kumaliza tendo la ndoa.
Uchunguzi unahusisha kuangalia historia ya ngono na afya kwa ujumla, pamoja na kipimo cha kuchoma ngozi (skin prick test) kwa kutumia shahawa ya mwanaume. Dkt. Carroll anaongeza kuwa tiba inaweza kufanywa kwa kutumia antihistamini au matibabu ya kupunguza aleji (desensitization therapy) ili kupunguza ukali wa hali hiyo.
