Lionel Messi yaraye afashije FC Barcelona kunyagira ikipe ya Mallorca mu mukino wa shampiyona ya Espagne yari yasubukuwe nyuma y’icyorezo cya Covid-19, aca agahigo ko kuba umukinnyi wa mbere ubashije gutsinda byibura ibitego 20 muri iyi shampiyona buri mwaka muri 12 ishize.
FC Barcelona yafunguye amazamu ku isegonda rya 66 ry’umukino, ku gitego cyatsinzwe na Arturo Vidal wari uterekewe umupira ku mutwe na Jordi Alba.
Umunya Denemark Martin Braithwaite wageze muri FC Barcelona muri Gashyantare uyu mwaka nk’umusimbura wa Ousmane Dembele wavunitse, yatsindiye FC Barcelona igitego cya kabiri ku munota wa 37 w’umukino, kiba icya mbere atsindiye iyi kipe kuva yayigeramo.
Amakipe yombi yagiye kuruhuka FC Barcelona iri imbere n’ibitego 2-0.
Umunya Uruguay Luis Suarez wari waravunitse muri Mutarama uyu mwaka, yinjiye mu kibuga asimbura mbere gato y’uko myugariro Jordi Alba atsindira ikipe y’umutoza Quique Setien igitego cya gatatu, ku munota wa 79 w’umukino. Ni ku mupira Messi yari amuhaye nk’uko yari yabigenje ku gitego cya Braithwaite.
Kapiteni Lionel Messi yatsindiye FC Barcelona agashinguracumu ku munota wa 90+3 w’umukino.
Ni igitego cya 20 Messi yatsindaga muri shampiyona ya Espagne y’uyu mwaka, kikaba cyanatumye ahita akora umuhigo wo kugeza byibura kuri ibi bitego muri buri umwe w’imikino kuva muri 2008.
Gutsinda Mallorca byafashije FC Barcelona gukomeza kuyobora shampiyona ya Espagne n’amanota 61, amanota atanu imbere ya Real Madrid iza ku mwanya wa kabiri. Iyi Real Madrid y’umutoza Zinedine Zidane iramanuka mu kibuga kuri iki cyumweru yakira Eibar, mu mukino w’umunsi wa 29 wa shampiyona.
Umukino wa Mallorca na FC Barcelona wakiniwe muri Stade yambaye ubusa, waranzwe no kwiharira umupira ku ruhande rwa Mallorca yakiniraga ku kibuga cyayo, gusa nta cyugazi gikomeye iyi kipe yigeze iteza izamu ry’Umudage Marc-Andre Ter Stegen.
