Liverpool yo mu Bwongereza yimye umukinnyi Mohamed Salah uruhushya rwo kujya gukinira Misiri mu marushanwa y’ibanze yo gushaka itike y’igikombe cy’Isi, kubera ko iki gihugu kiri ku mugabane wa Afurika kiri ku rutonde rutukura rwa Covid-19.
Ikipe ya Misiri iteganya gukina na Angola tariki ya 2 Nzeri 2021 na Gabon tariki ya 5 uko kwezi.
Misiri u Bwongereza bwayishyize ku rutonde rutukura, rusanzwe rubaho ibihugu byugarijwe cyane n’icyorezo cya Covid-19 ku Isi, bukaba burushingiraho butanga amabwiriza ku bagenzi babugana.
Abagenzi baturuka mu Misiri n’ibindi bihugu biri kuri uru rutonde bajya mu Bwongereza, basabwa kubanza kujya mu kato muri hoteli k’iminsi 10 nk’uko inzego z’ubuzima zabitanzeho amabwiriza.
Igitangazamakuru The Star cyo mu Bwongereza kivuga ko Liverpool yasanze mu gihe Salah yaba agiye mu Misiri, yazavayo akabanza gushyirwa mu kato k’ibyumweru bibiri mbere y’uko asubira muri bagenzi be.
Muri ibi byumweru, abakinnyi ba Liverpool bazakina imikino ya shampiyona ibiri, Salah adahari kandi ari umwe mu nkingi za mwamba ikipe ifite, by’umwihariko mu busatirizi.
Abandi bakinnyi Liverpool yimye uruhushya ni Roberto Firmino, Alisson Becker na Fabinho bakinira ikipe y’igihugu ya Brazil; igihugu nacyo kiri kuri uru rutonde rutukura.
