Ku butumire bwa Repubulika ya Moldavia, Umunyamabanga Mukuru wa Francophonie, Louise Mushikiwabo, yashyizeho itsinda ry’indorerezi zizakurikirana imigendekere y’amatora y’abagize inteko ishinga amategeko muri iki gihugu ateganyijwe ku itariki 11 Nyakanga 2021.
Izi ntumwa zoherejwe mu butumwa buzwi nka ‘Mission électorale de la Francophonie (MEF)’, ziyobowe na Madamu Eva Descarrega Garcia, Ambasaderi wa Andorre mu Bufaransa na Monaco, akaba n’uhagarariye Guverinoma y’igihugu cye muri mu kanama Gahoraho ka Francophonie.
Nk’uko bigaragara ku rubuga rwa OIF, muri izi ntumwa kandi harimo Véronique Guillotin, Umusenateri mu Bufaransa, akaba na perezidante w’ubucuti bushingiye kuri za sena hagati y’u Bufaransa na Moldavia, Umunya- Bulgaria, Alexandra Veleva, umujyanama mpuzamahanga mu bijyanye n’uburenganzira bwa muntu, Umunyatuniziya Ahmed Driss, Umuyobozi w’Ishuri rya Politiki rya Tunis, Antoine Michon, Umuyobozi ushinzwe ibibazo bya politiki n’imiyoborere ya demokarasi muri OIF na Cyrille Zogo Ondo, ushinzwe gahunda za OIF.
Izi ndorerezi zageze muri Moldavia guhera kuri uyu wa Kabiri, itariki 06 Nyakanga kuzageza ku itariki 12 Nyakanga, zizabonana na bamwe mu bantu n’inzego bazagira uruhare mu mitegurire y’amatora, abayobozi b’amashyaka y’ingenzi azaba ahanganye mu matora, abahagarariye za sosiyete sivile, n’abafatanyabikorwa mpuzamahanga bazaba bahari bakurikirana imigendekere y’ayo matora.
Umuryango wa OIF ubumbiye hamwe ibihugu bikoresha Igifaransa twabibutsa ko uhuriyemo ibihugu 88 na za guverinoma, harimo ibinyamuryango 54, 7 bifite ubunyamuryango bucagase n’ibihugu 27 by’indorerezi.
Kurikira ibiganiro n’amavidewo binyura kuri Bwiza TV
