Umuvugizi wa M23, Maj. Willy Ngoma, avuga ko biteguye kubahiriza imyanzuro yavuye mu nama y’abakuru b’ibihugu bya EAC i Nairobi muri Kenya kuwa 20 Kamena 2022, gusa ngo bafite impungenge z’imyitwarire ya Leta ya Tshisekdi,” yihunduranya nk’uruvu.” Maj. Ngoma mu kiganiro kigufi yahaye BWIZA kuwa 21 Kamena 2022, yavuze ko M23 ishimira abakuru b’ibihugu ku byemezo bafashe ariko agakemanga ubutetsi bwa Tshisekedi, ko buzubahiriza ibyo bwasabwe. Yagize ati ” Turashimira abakuru b’ibihugu kuri iriya nama. Twashimishijwe n’uburyo bamaganye imvugo z’urwango, kuvuga ngo abantu bicwe bitewe n’ubwoko bwabo, uko baremwe. Ibi bivugwa n’abajenerali, abanyepolitiki n’abanyamadini bibasira abo bita Abanyarwanda, abavuga Ikinyarwanda.” Ku kubahiriza imyanzuro y’inama y’i Nairobi, Ngoma ati ” Ku gushakisha amahoro twebwe turiteguye. Nibaduhamagara ngo twicarane na guverinoma tuzitabira kuko ntidukunda intambara, dukunda amahoro. Ikibazo ni Leta ya Congo, ntikunda amahoro. Ni abantu bahindagurika nk’uruvu. Bavuga ibintu saa munani, saa cyenda bagakora ibindi.” Maj. Ngoma yavuze ko bakirije yombi ibiri mu itangazo ry’abakuru b’ibihugu gusa ntacyo yasubije BWIZA ku kuba bava mu bice bamaze kwigarurira ndetse no kuba baba bagiye guhagarika imirwano, bakagana ku meza y’ibiganiro na Kinshasa. M23 yakunze kuvuga ko itangaza agahenge, ahubwo FARDC ikayigabaho ibitero. FARDC nayo ikunze kuvuga ko irwana M23 iba yayiteye mu birindiro byayo. Uko imirwano yubuye, izi mpande zombi zitana bamwana kuwaba yateye undi.
