Alhamisi, tarehe 26 Juni, Mahakama ya Afrika ya Haki za Binadamu na Watu (AfCHPR) ilitangaza kuwa ina mamlaka ya kusikiliza kesi iliyofunguliwa na Jamhuri ya Kidemokrasia ya Kongo (DRC) dhidi ya Rwanda.
Katika kikao chake cha 77 cha kawaida kilichofanyika Arusha, Tanzania, mahakama ilisema kuwa malalamiko ya DRC yanakubalika. DRC inaituhumu Rwanda kwa vitendo vya ukatili na ukiukaji wa haki za binadamu mashariki mwa nchi hiyo.
Kinshasa inalaumu Kigali hasa kwa kuvuka mipaka na kufanya mauaji katika Kivu Kaskazini tangu mwaka 2022.
Wanasheria wa Rwanda wamepinga mamlaka ya mahakama hiyo kusikiliza kesi hiyo.
Mahakama pia imesema kuwa uchunguzi kuhusu suala hilo utafanyika.
AfCHPR imeipa Rwanda siku 90 kuwasilisha maelezo yake, na DRC imepewa siku 45 kujibu kabla ya uamuzi kuhusu hoja kuu za kesi hiyo kutolewa.
