Umugabo witwa Ciza Dalton yatawe muri yombi nyuma yo gutaburura imibiri y’abantu bishwe kera, bikaba bikekwa ko bishwe n’abari abarwanyi n’inyeshyamba za FDD ubu yabaye CNDD FDD.
Ku wa Kane tariki ya 19 Nyakanga 2018, ubwo uyu mugabo yacukuraga icyobo cyo kubumbiramo amatafari muri komini ya Nyanza Lac, intara ya Makamba, ngo nibwo yaguye kuri iyo mibiri y’abo bantu.
Ikinyamakuru Ubm news gitangaza ko polisi yamutaye muri yombi imushinja kurundanyiriza hamwe iyo mibiri y’abantu benshi, nyuma ntamenyeshe ubuyobozi.
Abashinzwe umutekano mu Ntara ya Makamba, bakeka ko abo bantu baba barishwe mu 1996, bishwe n’inyeshyamba zari iza FDD, ubu yabaye CNDD FDD ari naryo shyaka riri ku butegetsi, ko aho ibyo byobo byahambwemo abantu byabonetse hari ibirindiro by’izi nyeshyamba.
Ubwo izi nyeshyamba zari zifite ibirindiro aha yabonye iki cyobo, we ngo yari yarahungiye muri Tanzania, ahunga intambara yabaye kuva mu 1993 kugeza ubwo hasinywaga amasezerano y’amahoro y’i Arusha.
Abashinzwe uburenganzira bwa muntu muri iyi ntara, bakaba basaba ko hakorwa iperereza abantu bashyinguye muri ibi byobo bakamenyakana bagashyingurwa mu cyubahiro, n’ababishe bakamenyakana bagashyikirizwa ubutabera.
