Abantu barenga 400 bacitse amacumbi bari baracumbikiwemo mu kato ka coronavirus mu majyepfo ya Malawi, aba bakaba bari babangamiwe n’amabwiriza ya Leta yo kwirinda icyorezo cya covid-19 ndetse n’ubwoba bwo kuba bashobora kuhandurira izindi ndwara nk’uko byatangajwe n’ibinyamakuru byo muri iki gihugu.
Abanya-Malawi barenga 400 baje baturutse muri Afurika y’Epfo nk’igihugu cya mbere mu kuzahazwa na covid-19 ku mugabane wa Afurika, bahise bashyirwa mu kato bakimara kugera muri Malawi bashyirwa mu kibuga kiri mu mujyi wa Blantyre nk’uko Nyasa Times kibitangaza.
Aba baturage bose bagombaga gupimwa covid-19 ariko ntibivugwa niba batorotse mbere yo gupimwa.Ibi bije nyuma y’umunsi umwe abandi bantu 8 basanzwemo covid-19 batorotse aho bari bashyizwe ngo bitabweho muri Brantyre.
Leta ya Malawi isa n’iri mu mazi abira kubera ingamba zafashwe nko kuba yakwita ku bantu binjira mu gihugu baturutse hanze bidashyirwa mu bikorwa nk’uko bikwiye.Leta ivuga ko nta buryo bishoboka bwo kugenzura intambwe zose umuntu ateye cyane cyane muri uyu mujyi ushyirwamo abarwayi n’abakekwaho icyorezo kandi usanga abari mu kato bemerewe kujya hanze guhaha amafunguro n’ibindi nkenerwa.
Mbere y’uko aba bantu batoroka ngo bari barabanje gutakambira Leta bavuga ko ibyo kurya,amazi meza ndetse n’ibikoresho by’isuku ari imbogamizi ku mibereho barimo.
Dorothy Ngoma,umukangurambaga w’ubuzima muri aka have,yabwiye Nyasa Times ko bihangayikishije kuba umubare ungana utya watorotse akato ndetse bikaba byatuma Malawi yabaruraga abanduye 101 n’abapfuye 4 ishobora kwisanga yaguye mu mutego w icyorezo.
Abantu bakabakaba miliyoni 6 ku isi bamaze kwandura icyorezo cya covid-19,abasaga 2,3700,000 barakize nk’uko bitangazwa na Kaminuza “Johns Hopkins University” yo muri Leta Zunze Ubumwe za Amerika.
