Ingabo z’u Bufaransa zivuganye Baye Ag Bakabo, umwe mu b’ingenzi bakekwaho kwica abanyamakuru babiri b’Abafaransa bakoreraga RFI, Ghislaine Dupont na Claude Verlon, muri Operation yabereye mu majyaruguru ya Mali.
“Bitwaga Ghislaine Dupont na Claude Verlon, bari Abafaransa, bari abanyamakuru. Ku ya 2 Ugushyingo 2013, bashimutiwe muri Mali bicwa n’abaterabwoba ba al-Qaeda muri Maghreb ya kisilamu. Umuyobozi wa kijihadiste wateguye ishimutwa n’iyicwa ryabo amaze kwicwa n’ingabo zo muri Barkhane.”
Mu butumwa bwatambukijwe ku mbuga nkoranyambaga, mu ijwi rikakaye, minisitiri w’ingabo w’u Bufaransa, Florence Parly, niwe watangaje ko Baye Ag Bakabo, wari umuyobozi mu mutwe w’iterabwoba wa Aqmi (Al-Qaeda in the Islamic Maghreb) wagize uruhare mu iyicwa ry’aba banyamakuru b’Abafaransa yishwe.
Baye Ag Bakabo akaba yarishwe mu gikorwa cya gisirikare cyagabwe n’ingabo z’Abafaransa muri Operation Barkhane ku itariki 05 Kamena mu karere ka Aguelhok, mu majyaruguru ya Mali.
Minisitiri w’ingabo w’u Bufaransa akaba yatangaje ko bamenye amakuru y’uko uyu mutwe wateguraga kugaba igitero ku birindiro bya batayo y’ingabo za Tchad ziri mu butumwa bwa Minusma, bakagikoma imbere bakicamo abaterabwoba bane barimo Bakabo.
Kurikira ibiganiro n’amavidewo binyura kuri Bwiza TV
