Mu itangazo rigenewe abanyamakuru, inteko iri ku butegetsi muri Mali yatangaje kuri uyu wa Gatatu itariki 10 Nyakanga ko yongeye guha uburenganzira imitwe ya politiki bwo gukora ibikorwa byayo.
Ibikorwa by’imitwe ya politiki n’amashyirahamwe afitanye isano n’ibikorwa bya politiki mu gihugu byahagaritswe ku itariki ya 10 Mata, bituma habaho kunengwa.
Nyuma y’amezi atatu, Bamako yisubiye. Itangazo rigenewe abanyamakuru ry’inama y’abaminisitiri, yiganjemo igisirikare cyahiritse ubutegetsi mu 2020, rivuga ko “Guverinoma yafashe icyemezo cyo gukuraho ingamba zo guhagarika ibikorwa by’amashyaka ya politiki n’amashyirahamwe afitanye isano n’ibikorwa bya politiki”.
Umuyobozi w’igihugu, Colonel Assimi GoĂŻta, yemeje ihagarikwa ry’ibikorwa byayo muri Mata, ashinja amashyaka gukoresha “ibiganiro bidafite ishingiro” no kubangamira umutekano w’igihugu.
Yashimangiye akaga ibikorwa by’amashyaka byari gushyira ku Nama y’Umushyikirano yari ikomeje KU hazaza ha politiki y’igihugu nk’uko tubikesha RFI.
Icyo gihe amashyaka yigaragambije yamagana kugumana abasirikare mu buyobozi bukuru bw’igihugu nyuma y’itariki ntarengwa yo muri Werurwe 2024 bari biyemeje yo gutegura amatora anyuze muri Demokarasi.
Amashyaka akomeye n’asigaye muri opozisiyo yari yafashe icyemezo cyo kwanga kwitabira ibi “biganiro”. Ibi ariko byarabaye byitabirwa n’abashyigikiye ubutegetsi.
Muri Gicurasi byarangiye hatanzwe ibyifuzo birimo kurekera ingabo ku butegetsi “mu myaka ibiri kugeza kuri itanu”, ndetse no kuba kandidatire y’umuyobozi uriho ubu mu matora ya perezida azaza yakwemerwa.
