Kuri iki cyumweru tariki ya 20 Ukwakira 2019 ku isaha ya saa kumi n’imwe n’igice z’ikigoroba ni bwo umukino wahuzaga Manchester United na Liverpool wari utangiye, urangira amakipe yombi anganyije 1-1.
Wari umukino wavuzweho byinshi cyane, nta mahirwe Manchester United ihabwa yo kuba yatsinda cyangwa ikanganya na Liverpool bitewe n’uburyo imaze iminsi yitwara. United yaje ishaka guhinyuza ibivugwa maze ku munota wa 36 Marcus Rashford ayitsindira igitego, igice cya mbere kirangira gityo.
Igice cya kabiri cyatangiranye ingufu nyinshi n’ubusatirizi ku mpande zombi, ikipe ya Liverpool ishakisha igitego cyo kwishyura, United ishaka igitego cya kabiri cyatuma imitima ituza nta gitutu ariko ku munota wa 85 Adam Lallana wa Liverpool aba arishyuye. Umukino wageze kumunota wa 90 n’inyongera y’iminota 5 ari 1-1, ikipe zigabana amanota.
Uyu mukino wabereye ku kibuga Old Trafford cya United watumye Liverpool igira amanota 25, iguma ku mwanya wa mbere w’agateganyo, mu gihe United yagiye ku mwanya wa 13 n’amanota 10.
NDAYIRAGIJE MAX JUSTIN/Bwiza.com
