Mbunge wa Makindye West, Allan Ssewanyana — kutoka chama cha NUP kinachoongozwa na Bobi Wine (pichani kulia) — ameshtakiwa kwa ugaidi kufuatia mabadiliko ya hati ya mashtaka yaliyofanywa na Mkurugenzi wa Mashtaka ya Umma, yaliyomwondoa marehemu Muhammad Ssegirinya kwenye kesi hiyo.
Mnamo Jumatatu, Ssewanyana alifikishwa mbele ya Jaji Alice Komuhangi Khauka pamoja na washitakiwa wenzake Mike Sserwadda, Jackson Kanyike, Bull Wamala, na John Mugerwa, ambapo walitakiwa kusomewa mashtaka mapya.
Kwa mujibu wa ChimpReports, Ssewanyana anashtakiwa kwa kusaidia na kushirikiana katika vitendo vya ugaidi.
Mashtaka yanasema kuwa kati ya Januari na Agosti 2021, katika maeneo ya Rakai na Masaka jijini Kampala, Ssewanyana — aliyekuwa na silaha na akidaiwa kuwa na malengo ya kisiasa, kijamii au kidini — alihusika moja kwa moja au kwa njia isiyo ya moja kwa moja katika mauaji ya Kizza Mugerwa, Sulaiman Kakooza, na Tadeo Kiyimba, pamoja na jaribio la kumuua Ronald Sebyoto, wote wakiwa wakazi wa kijiji cha Ssettaala.
Mwendesha Mashtaka wa Serikali, Richard Birivumbuka, aliomba mahakama iwakute washitakiwa na hatia ya mauaji, jaribio la kuua, na kusaidia ugaidi. Hata hivyo, Jaji Komuhangi alisema ushahidi utapitiwa na uamuzi utatolewa mwezi Agosti.
Mashtaka haya mapya yameibuka baada ya Ssewanyana kumtuhumu mbunge mwenzake, Mathias Mpuuga, kuwa ndiye alipanga kukamatwa kwake kuhusiana na kesi hiyo.
