Rutahizamu w’ikipe y’igihugu ‘Amavubi’, Meddie Kagere, yafashije Simba Sports Club akinira gutsinda Dodoma Jiji ibitego 2-1, ahita yongera kuyobora urutonde rw’abamaze gutsinda ibitego byinshi.
Simba na Dodoma bari bahuriye mu mukino w’umunsi wa 18 wa shampiyona ya Tanzania.
Kagere ni we wafunguriye amazamu iyi kipe y’umutoza Didier Gomes da Rosa ku munota wa 29 w’umukino, ku mupira muremure yari akatiwe n’umunya-Ghana Benard Morrison.
Morrison wahoze akinira Yanga Africans ni we watsindiye Simba igitego cya Kabiri ku munota wa 66 w’umukino, ku mupira yari ahawe n’umunya-Zimbabwe Perfect Chikwende Simba iheruka gukura muri FC Platinum y’iwabo.
Impozamarira ku ruhande rwa Dodoma yatsinzwe na Cleophas Mkandala wishyuye igitego cya Kagere.
Igitego Meddie Kagere yatsinze cyatumye ayobora urutonde rw’abamaze gutsinda ibitego byinshi aho afite 8, anganya na Kapiteni we, John Rafael Bocco.
Gutsinda Dodoma byatumye Simba Sports Club imaze gukina imikino 16 igira amanota 38, aho ikirushwa amanota atandatu na Yanga Africans ya mbere ku rutonde rw’agateganyo.
