Urukiko rw’Ubucuruzi muri Uganda rwatangaje ko rwatesheje agaciro ikirego cyari cyatanzwe na Meya w’Umujyi wa Entebbe, Fabrice Brad Rulinda, yaregagamo Banki ya Stanbic Uganda ku bijyanye n’amafaranga angana na $73,262.50 (asaga miliyoni 104 Frw).
Mu mwanzuro wasomwe ku wa Mbere mu buryo bw’ikoranabuhanga, umucamanza Stephen Mubiru yavuze ko iki kirego kidashobora kwemerwa, bitewe n’uko ayo mafaranga yari afitanye isano n’ibikorwa binyuranyije n’amategeko.
Inyandiko z’urukiko zigaragaza ko Rulinda yari afite konti y’amadolari muri Stanbic Bank, ishami rya Bugolobi. Ku wa 10 Kanama 2017, sosiyete yitwa Green Global Corporation yohereje $422,957.50, ikurikirwa n’andi $73,262.50 ku wa 11 Kanama 2017.
Nyuma, banki yasubije amafaranga ya kabiri ku wayohereje, ibintu Rulinda yavuze ko byakozwe nta burenganzira yatanze, bityo arega banki ayishinja kutubahiriza amasezerano.
Banki yasobanuye ko ayo mafaranga yari ateye amakenga, inabimenyesha Ikigo gishinzwe gukurikirana imikoreshereze y’imari (FIA), nyuma y’uko Rulinda atatanze ibisobanuro bihagije ku nkomoko yayo.
Urukiko rwasanze: Rulinda yatanze ibisobanuro bitandukanye kandi bitumvikana ku nkomoko y’ayo mafaranga
Hari ibimenyetso bikomeye by’uko ayo mafaranga afitanye isano n’umutwe wa M23 ukorera mu burasirazuba bwa Repubulika Iharanira Demokarasi ya Congo
Umucamanza yavuze ko nubwo banki yakoze amakosa yo gusubiza amafaranga itabanje kubanza kubona icyemezo cy’urukiko, amasezerano yari ashingiye ku bikorwa bitemewe n’amategeko, bityo nta gaciro yagombaga guhabwa.
