Minisitiri w’urubyiruko n’ikoranabuganga, Jean Philbert Nsengimana yabwiye urubyiruko ko rukwiye kubyaza umusaru amahirwe rufite rukesha imiyoborere myiza mu kwiteza imbere ubwo hizihizwaga umunsi mpuzamahanga w’urubyiruko mu muryango w’abibumbye, ababwira ko kuba igihugu gifite umutekano n’ubukungu bukazamuka ku buryo bushimishije ari amahirwe bakwiye gukoresha bakagira uruhare mw’izamuka ry’ubukungu bw’igihugu.
Nsengimana yabwiye urubyiruko ko bakwiye kubyaza umusaruro ishoramari bateza imbere ubuhinzi bugakorwa ku buryo bw’umwuga, akangurira urubyiruko kwibumbira mu matsinda, bagakoresha amahirwe ahari ndetse bakongera ubumenyi bwabo ubundi bagashaka igishoro bakiteza imbere bateza n’imbere n’igihugu.
Uyu munsi w’urubyiruko ku rwego rw’igihugu wizihirijwe mu murenge wa Muganza, mu karere ka Rusizi, ufite intego igira iti “umurimo unoze hifashishijwe ICT”.
Uyu munsi wahujwe no gutangiza ubukangurambaga bwiswe “KORANUBUHANGA” bugamije kwitabira gukoresha ikoranabuhanga mu kwihutisha serivisi harimo gukoresha Irembo n’izindi gahunda zo kwishyura bakoresheje ikoranabuhanga buzwi nka e-payment.
Minisitiri yabwiye urubyiruko rwo mu karere ka rusizi kubyaza umusaruro amahirwe bafite arimo ikiyaga cya Kivu, na Pariki ya Nyungwe bakabibyaza umusaruro.
Yabwiye uru rubyiruko ko iyi pariki ihuruza abakerarugendo n’ikiyaga cya Kivu kigakorerwamo uburobyi ariko abaturage bo mu kirwa cya Nkombo bavuzeko ibikorwa byinshi by’ubukungu bwabo bushingiye ku burobyi, ariko ubu burobyi bugakorwa ku buryo buciriritse, avuga ko urubyiruko rukwiye kwiga uburyo ubu burobyi bwakorwa kuburyo bugezweho buteye imbere.
Ayandi mahirwe aboneka badakoresha ni ubworozi kuko umusaruro w’ubworozi ufite isoko ku mupaka uhuza u Rwanda na Repuburika Iharanira Demokarasi ya Congo, agaragaza ko bagiye kubafasha kuzamura ubu bworozi.
Minisitiri yongeye kugaragariza urubyiruko ko rukwiye kubyaza umusaruro amahirwe bashyiriweho na Guverinoma y’ikigega cyishingira ingwate ku rubyiruko aho babishingira 75 % ku nguzanyo ndetse bakabagira inama ku mishinga y’iterambere bafite.
Urubyiruko rwiyemeje kurwanya ibiyobyabwenge bigira uruhare mu kwangiza ubuzima bwabo, ndetse rufata gahunda yo gukorera hamwe.
Umuhuzabikorwa w’urwego rw’igihugu rw’urubyiruko, Uwinyirigira Clarise yavuze ko urubyiruko rugiye kwitabira ibikorwa byinshi bitandukanye bizamura igihugu harimo ubuhinzi, ubworozi, ubugeni n’ubukorikori, ariko agaragaza ko hakiri ikibazo cy’isoko ry’umusaruro kuko urubyiruko rwinshi ibi bikorwa babikorera mu ngo zabo kuko udukiriro tukiri ducye.
Umunsi mpuzamahanga w’urubyiruko watangiye kwizihizwa buri mwaka guhera mu mwaka wa 2000 hagamijwe kwigira hamwe umuco n’ibindi bikorwa by’amategeko bireba urubyiruko.
Kanda hano ujye ubona amakuru yihuse kandi kugihe kuri Facebook no kuri twitter
Tuyishime Malachie/Bwiza.com
