Minembwe: Imbunda n'amasasu ntibishobora kutuzanira amahoro- Umufasha wa Gen.Bisengimana

Dyna Nantebuka, ni umugore wa Gen. Bisengimana Charles wahoze ari umuyobozi mukuru wa Polisi ya Repubulika iharanira Demokarasi ya Congo, akaba asaba amoko yose yo muri Teritwari ya Minembwe, gutahiriza umugozi umwe, kuko intambara ntacyo yabagezaho.

Nantebuka yasabye abaturage b’i Minembwe bose, kubana mu mahoro, bakareka amacakubiri ngo kuko ntabwo yabageza ku iterambere. Uyu mudamu wagiranye inama n’abagore bo muri aka gace ka Minembwe, yasabye batanu muri bo, baturuka mu moko atandukanye, kubanza kwegerana bagasenga Imana, basaba amahoro mu gihugu cyabo.

Abasaba kubana mu mahoro, yagize ati “Imbunda n’amasasu ntibiteze kutugarurira amahoro uretse gusenga Imana, dukorera hamwe ndetse no gukundana, twese nidushyira hamwe, nta kabuza akarere kacu kazarangwamo amahoro ndetse tunagateze imbere”.

Uru ruzinduko yagiriye muri aka gace ka Minembwe kagizwe n’imisozi Miremire, Dyna yasize agatanzemo imfashanyo y’imyenda ku bagore basaga 100 , abo iyi mfashanyo yagezeho bakaba biganjemo abatwikiwe mu ntambara y’amoko imaze iminsi muri aka gace.

Ikinyamakuru Imurenge dukesha iyi nkuru gikomeza gitangaza ko Dyna Nantebuka ari umwe mu ntumwa zari zaturutse i Kinshasa, zisura abaturage b’i Minembwe, zibasaba gushyira hamwe.

Iri tsinda ryasuye Minembwe no mu bindi bice bihegereye, ryari riyobowe n’umukuru w’ibiro bya Perezida wa Congo, Vital Kamerhe ndetse na Azarias Ruberwa.

Hashize igihe humvikana intambara hagati y’ ubwoko bw’Abanyamulenge, burwana na Mai-Mai n’ubundi bwoko bw’Ababembe n’Abafulero n’indi mitwe y’inyeshyamba irimo ngo n’abavuga ikirundi. Bamwe baburiye ubuzima muri iyi ntambara yanatumye ibihumbi by’abaturage bahunga, bamwe muri bo batwikirwa inzu, imitungo irimo n’inka birasahurwa.

Ubwo Gen. Amisi Gabriel, wungirije Umugaba Mukuru w’Ingabo za Repubulika Iharanira Demokarasi ya Congo, yasuraga aka gace ka Minembwe mu mpera z’ukwezi gushize, abo mu bwoko bw’abanyamulenge baramutakambiye bamugaragariza akarengane bakomeje kugirirwa n’inyeshyamba zirimo n’izivuga Ikirundi.

Uruzinduko rwa Gen. Amisi Gabriel rukaba rwarabayeho nyuma y’aho Perezida Tshisekedi asabiye ko ingabo za Leta zagaba ibitero ku nyeshyamba zibuza abaturage amahoro muri teritwari zitandukanye zirimo n’iya Minembwe.