Kuri uyu wa Gatatu, ingabo z’Umuryango w’Abibumbye zishinzwe kubungabunga amahoro muri Repubulika iharanira Demokarasi ya Congo (Monusco) zoherejwe mu gace ka Panzi, muri Bukavu, ho muri Kivu y’Amajyepfo mu rwego rwo kurinda Dr Denis Mukwege umaze iminsi atabarizwa bivugwa ko ubuzima bwe buri mu kaga.
“Twishimiye ko ingabo z’amahoro za MONUSCO zagarutse mu Bitaro bya Panzi muri iki gitondo, kurinda umutekano w’uwadushinze / Umujyanama udasanzwe ndetse n’uwahawe igihembo cy’amahoro cyitiriwe Nobel 2018, Dr Denis Mukwege, ndetse n’umuryango we, abarwayi be n’abakozi be “, ibi bikaba byatangajwe na fondasiyo ye mu itangazo yashyize ahagaragara.
Iri tangazo rikomeza rivuga ko ubusabe bwo kumusabira uburinzi bwumviswe neza ndetse byagaragaye kuri uyu wa Gatatu Monusco isubira muri aka gace itaherukagamo nk’uko tubikesha Actualite.cd.
Iri tangazo ariko risaba Loni n’Umuryango Mpuzamahanga muri rusange gushakira igisubizo kirambye ikibazo cy’umutekano wa Dr Mukwege.
Denis Mukwege, wifuza ko hashyirwa ahagaragara raporo izwi nka maping report yo mu 2010 ndetse no gushyiraho urukiko rwo kuburanisha ibyaha byose byakorewe mu burasirazuba bwa RDC, yatangaje mu minsi yashize ko yari akomeje guterwa ubwoba akangishwa kwicwa.
