Katika wilaya ya Nyamasheke, mwanamke mwenye umri wa miaka 51 amekamatwa na Ofisi ya Upelelezi wa Jinai ya Rwanda (RIB) kwa tuhuma za kumuua mume wake wa miaka 61 usiku wa tarehe 9 Mei 2025, baada ya kumkuta akifanya mapenzi na mwanamke mwingine.
Tukio hilo lilitokea katika kijiji cha Rubona, seli ya Nyarusange, sekta ya Kirimbi. Viongozi wa eneo hilo wanasema kuwa migogoro ya kifamilia kuhusu mali na wivu wa mapenzi huenda ndio chanzo cha mauaji hayo.
Shahidi mmoja alisema kuwa mume alimwomba mkewe waende kuvuna kahawa pamoja, lakini mke alikataa kwa kusema kuwa hawezi kuendelea kufanya kazi ngumu kwa ajili ya ndugu wa mumewe, huku akimtuhumu kuwa anatumia pesa za kahawa kwa ajili ya kimada wake.
Mume alipoona hawaelewani, alimwita mwanamke mwingine kutoka seli ya Jarama, sekta ya Gihombo, ili amsaidie kuvuna kahawa kwa malipo.
Majira ya saa tatu asubuhi, mke wa marehemu aliamua kuwafuata akidai kupeleka chakula, lakini lengo halisi lilikuwa kuthibitisha mashaka yake. Alipofika, aliwakuta wakiwa katika tendo la ndoa. Alijaribu kumpiga yule mwanamke lakini alitoroka, ndipo akampiga mume wake kwa jembe la mkono.
Baada ya kumjeruhi, hakutoa msaada bali alimwangalia akiteseka na kupoteza damu. Hatimaye mume alijikokota hadi kwa wakazi waliokuwa karibu, waliompeleka kwa pikipiki hadi kituo cha afya cha Karengera, lakini alifariki muda mfupi baada ya kufika.
Mkewe alimfuata hadi kituo hicho cha afya na akakiri kuwa ndiye aliyemuua, akieleza sababu ya tendo hilo. Polisi na RIB walimkamata mara moja.
Katibu Mtendaji wa sekta ya Kirimbi, Bwana Habimana Innocent, alithibitisha tukio hilo na kusema kuwa wananchi walitaka kumshambulia mwanamke huyo, lakini mamlaka zilichukua hatua ya haraka kumlinda hadi alipokabidhiwa kwa RIB.
Mwili wa marehemu ulipelekwa Hospitali ya Kibogora kwa uchunguzi, huku mtuhumiwa akishikiliwa katika kituo cha RIB cha Kanjongo.
