Abakinnyi batarengeje imyaka 13 y’amavuko b’irerero ry’umupira w’amaguru rya Paris Saint Germain mu Rwanda, babonye itike y’umukino wa nyuma w’irushanwa ry’amarerero y’iyi kipe ku Isi, nyuma yo gutsinda imikino yose.
Mu mukino ubanza wabaye tariki ya 21 Gicurasi 2022, iyi kipe yatsinze Koreya y’Epfo ibitego bine ku busa (4-0), uwakurikiyeho itsinda Qatar ibitego bitandatu ku busa (6-0).
Iyi kipe kuri uyu wa 22 Gicurasi yatsinze Academy ya Amerika y’iburasirazuba ibitego bitanu kuri kimwe (5-1), itsinda iyo mu Bufaransa ibitego bitatu ku busa (3-0).
Mu mikino ya ½ cy’irushanwa, iyi kipe na bwo yaje gutsinda iya Misiri ibitego bitatu kuri kimwe (3-1), ibona itike yo guhurira n’iya Brazil ku mukino wa nyuma uraba kuri uyu wa 23 Gicurasi.
PSG Academy Rwanda y’abatarengeje imyaka 11 y’amavuko na yo iri muri iri rushanwa, kuri uyu wa 22 Gicurasi yakinnye umukino wa gatatu mu itsinda yari iherereyemo, itsinda Amerika y’iburasirazuba ibitego 4-3, ariko muri ½ itsindwa n’iya Brazil ibitego 3-2.
Iyi kipe y’abatarengeje imyaka 11 nyuma yo kubura itike y’umukino wa nyuma, irahatanira n’iya Amerika y’iburengerazuba umwanya wa gatatu kuri uyu wa 23 Gicurasi.
Aba bana bari mu Bufaransa guhera tariki ya 19 Gicurasi 2022.
