Minisitiri w’Intebe wa Côte d’Ivoire akaba na Minisitiri w’Ingabo, Hamed Bakayoko, yapfiriye mu bitaro byo mu Budage kuri uyu wa 10 Werurwe 2021 azize indwara y’umutima, akaba ari uwa kabiri upfuye kuva muri Nyakanga 2020.
Inkuru y’urupfu rwe yemejwe na Perezida w’iki gihugu, Alassane Ouatara abicishije ku rubuga rwa Twitter, agira ati: “Igihugu kiri mu kiriyo. Mbabajwe no kubabikira urupfu rwa Minisitiri w’Intebe, Hamed Bakayoko, Umukuru wa Guvinoma, Minisitiri w’Ingabo, kuri uyu wa Gatatu 10 Werurwe 2021, mu Budage, azize kanseri.”
Jeune Afrique ivuga ko Bakayoko yatangiye kumererwa nabi mu minsi mike ishize, mu ntangiriro z’uku kwezi ajya kwivuriza mu bitaro by’Abanyamerika biherereye mu mujyi wa Paris mu Bufaransa. Yakomeje kuremba, ajyanwa mu bitaro biri mu mujyi wa Freiburg mu Budage, tariki ya 6 Werurwe 2021, ari naho yaraye apfiriye.
Bakayoko yafashe inshingano nka Minisitiri w’Intebe asimbuye Amadou Gon Coulibaly wapfiriye mu murwa mukuru Abidjan tariki ya 8 Nyakanga 2020 na we azize indwara y’umutima.
Inkuru y’urupfu rwa Coulibaly yashenguye cyane abanya-Côte d’Ivoire kuko ishyaka riri ku butegetsi ryari ryaramaze kwemeza ko ari we uzarihagararira mu matora y’Umukuru w’Igihugu yabaye mu Kwakira 2020, asimbuye Perezida Ouatara wari watangaje ko atazongera kwiyamamaza.
Hamed Bakayoko apfuye yari afite imyaka 56 y’amavuko, yujuje tariki ya 8 Werurwe 2021.
Kurikira ibiganiro n’amavidewo binyura kuri Bwiza TV
