Agahinda ni kenshi ku bakunzi n’abafana ba Arsenal FC, imwe mu makipe y’ubukombe mu Bwongereza, nyuma y’aho ikomeje kwitwara nabi muri shampiyona y’icyiciro cya mbere, English Premier League.
Ubwo umwaka w’imikino w’2020/2021 watangiraga, abakunzi n’abafana b’iyi kipe batangiye kumwenyura kuko yabanje gutsinda imikino ibiri; uwayihuje na Fullham tariki ya 12 Nzeri 2020, ikawutsindamo ibitego 3-0 n’uwayihuje na Westham United tariki ya 17 Nzeri, iwutsindamo 2-1.
Bamwe bizeye ko ikomereza muri uyu mujyo kuko n’ubundi mbere y’uko shampiyona itangira, Arsenal yari imaze gutwara ibikombe bibiri bikomeye mu Bwongereza; FA Cup yatwaye itsinze Chelsea ibitego 2-1 (tariki ya 1 Kanama 2020) na Community Shield yatweye itsinze Liverpool penaliti 5-4 nyuma y’aho umukino wari warangiye amakipe anganya 1-1 (umukino wabaye tariki ya 29 Kanama).
Gusa iki cyizere cyatangiye kuyoyoka tariki ya 28 Nzeri 2020 ubwo muri shampiyona, Arsenal yatsindwaga na Liverpool ibitego 3-1. Yaje kugarukana insinzi ku mukino wayihuje na Sheffield United tariki 4 Ukwakira, yatsinzemo ibitego 2-1 ariko ntibyayibujije gutangira urugendo waranzwe no gutsinda ku kigero cy’10%.
Yatangiye urugendo rwo gutsindwa
Byatangiye tariki ya 17 Ukwakira 2020 ubwo Manchester City yakiriraga Arsenal ku kibuga cyayo, Etihad Stadium. Arsenal ntibyayigendekeye neza kuko yatsinzwe igitego 1-0, amanota atatu ya kabiri irayatakaza.
Umukino wakurikiyeho wabereye ku kibuga cyayo tariki ya 25 Ukwakira 2020. Yakiriye Leicester City, nayo iyitsinda igitego 1-0, igiteranyo cy’amanota yari imaze gutakaza kigera ku 9.
Mu mukino wakurikiyeho wabaye tariki ya 1 Ugushyingo, Arsenal yakiriwe na Manchester United. Arsenal yatsinze igitego 1-0.
Imikino 7 yakurikiyeho, Arsenal yabonyemo amanota 2
Urugendo rwa Arsenal muri Premier rwatangiye kubiha kurushaho kuva tariki ya 8 Ugushyingo kugeza magingo aya, aho amanota abiri ari yo yabashije kubona mu mikino umunani yakinnye.
Tariki ya 8 Ugushyingo, iyi kipe yakiriye Aston Villa, itakaza amanota atatu ku bitego 3-0 yatsinzwe. Umukino wakurikiyeho, yakiriwe na Leeds United, urangira amakipe yombi anganyije 0-0.
Tariki ya 29 Ugushyingo, Arsenal yakiriye Wolves, nabwo ihatakariza andi manota, itsinzwe ibitego 2-1. Ku mukino wakurikiyeho tariki ya 6 Ukuboza, yakiriwe na Tottenham nayo iyitsinda ibitego 2-0.
Urugendo rwa Arsenal muri shampiyona rwakomeje kuyibihira, ubwo yakinaga na Burnley tariki ya 13 Ukuboza, nabwo itsindwa igitego 1-0.
Ku mukino wayihuje na Southampton tariki ya 16 Ukuboza, iyi kipe yaje kwihagararaho bijyanye n’uko yari imaze iminsi yitwara, inganya 1-1. Mu wundi wabaye kuri uyu wa 19 Ukuboza 2020, Everton yakiriye Arsenal, iyitsinda ibitego 2-1.
Amakarita atukura no kwitsinda
Muri iyi mikino, Arsenal yaranzwe n’amakosa yatumaga rimwe na rimwe abakinnyi bayo bitsinda ibitego, cyangwa se bagahabwa amakarita atukura, bagasohorwa mu kibuga hakiri kare.
Ayo yagaragaye mu mikino nk’uwo yanganyijemo na Leeds United 0-0 tariki ya 22 Ugushyingo, ubwo Nikolas Pepe yerekwaga ikarita itukura ku munota wa 51 w’umukino.
Ku mukino Burnley yatsinzemo Arsenal igitego 1-0 tariki ya 13 Ukuboza, Granit Xhaka yeretswe ikarita itukura ku munota wa 56, rutahizamu Pierre Aubameyang yitsinda igitego ku munota wa 73.
Ubwo Arsenal yanganyaga na Southampton igitego 1-1 tariki ya 16 Ukuboza, Gabriel Martinelli yari yeretswe ikarita itukura ku munota wa 62 w’umukino.
Ku mukino wahuje iyi kipe na Everton kuri uyu wa 19 Ukuboza, Rob Holding wa Arsenal na we yitsinze igitego ku munota wa 62.
Kugeza ubu, Arsenal ifite amanota 14 mu mikino 14 imaze gukina muri shampiyona 2020/2021. Iyakesha imikino 4 yatsinze n’indi 2 yanganyije. Ku rutonde rw’agateganyo, iri ku mwanya wa 15.
