Mu myitozo ikaze Iran yaburiye Israel mu gihe yatera aho itunganyiriza ingufu za Nukleyeri

Ku wa Gatanu, Iran yakoze ikiswe imikino y’intambara (cyangwa imyitozo) mu Kigobe ivuga ko yari igamije kohereza umuburo kuri Israel, nk’uko abayobozi bakuru b’ingabo z’iki gihugu babitangaje, mu gihe hari impungenge z’uko Israel ishobora kwibasira ibirindiro bya bya Iran bitunganyirizwamo ingufu za kirimbuzi za nukleyeri.

Imikino y’intambara y’Ingabo zishinzwe kurinda impinduramatwara za Iran yarimo kurasa misile zishobora kuraswa ahantu kure zirimo ibiturika byemewe mu ntambara cyangwa ubumara bwa kirimbuzi bita (ballistic missiles) na misile zigendera ku ntera yo hasi (cruise Missiles).

Televiziyo ya Leta yerekanaga misile zerekeza ku gipimo gisa nk’ahantu Israel itunganyiriza ingufu za Nukleyeri hazwi nka Dimona mu gusoza imyitozo yo ku wa Gatanu.

Ibiro ntaramakuru bya Iran, Tasnim, byagize biti: “Binyuze mu kwigana ahatunganyirizwa ingufu za kirimbuzi ha Dimona, ingabo z’impinduramatwara zagabye igitero kuri iki kigo gikomeye cy’ubutegetsi bwa Zayoni mu myitozo ya misile.”

Umuyobozi mukuru w’ingabo, Gen. Hossein Salami, kuri televiziyo y’igihugu yagize ati: “Iyi myitozo yari ifite ubutumwa busobanutse neza: bukomeye, nyabwo … bwo kuburira ku iterabwoba ry’abayobozi b’ubutegetsi bwa Zayoni kugira ngo birinde amakosa yabo.”

Salami yongeyeho ati: “Tuzabaca amaboko nibibeshya. … Intera iri hagati y’ibikorwa nyirizina n’imyitozo ya gisirikare ni uguhindura gusa uruhande rwo kohereza misile”.

Umuyobozi mukuru w’ingabo, Maj. Gen. Mohammad Bagheri yavuze ko misile 16 zo mu bwoko bwa ballistique zo mu byiciro bitandukanye zarashwe icya rimwe kandi zisenya igipimo zari zahawe.

U Bwongereza bwamaganye iraswa rya misile ballistic mu gihe cy’imikino y’intambara nk’uko bitangazwa n’Ibiro Ntaramakuru by’Abongereza, Reuters.

Ibiro by’ububanyi n’amahanga byagize biti: “Ibi bikorwa bibangamiye umutekano w’akarere ndetse n’amahanga, kandi turasaba Iran guhita ihagarika ibikorwa byayo”.

Umuvugizi wa Minisiteri y’ububanyi n’amahanga ya Iran, Saeed Khatibzadeh, yamaganye aya magambo y’u Bwongereza avuga ko ari “ukwivanga mu bushobozi bwo kwirwanaho bwa Iran”.

Iran ivuga ko misile zayo zo mu bwoko bwa ballistique zifite ubushobozi bwo kugera mu ntera ya kilometero 2.000 kandi zishobora kugera ku birindiro bikomeye bya Israel ndetse n’ibirindiro by’Amerika muri ako karere.