Mu Nteko ya EU, hahishuwe ibanga rikomeye ku rukingo rwa Pfizer

Mu ibazwa ryakozwe na komite y’inteko ishinga amategeko y’umuryango w’ubumwe bw’Uburayi (EU) ishinzwe kurwanya icyorezo cya Covid-19, ku wa 10 Ukwakira 2022 hahishuwe ibanga rikomeye ku rukingo rwa Pfizer.

Umudepite Robert Roos uhagarariye u Buholandi muri iyi nteko, yabajije Janine Small ushinzwe amasoko muri Pfizer niba mbere y’uko uru rukingo rugera ku isoko, harabanje gukorwa isuzuma kugira ngo bamenye niba rwashobora gukumira ikwirakwira ry’iki cyorezo.

Roos yabajije ati: “Mfite ikibazo gito kandi nkeneye igisubizo cyumvikana. Ndavuga mu Cyongereza kugira ngo hatabaho kunyumva nabi. Ese urukingo rwa Pfizer rwasuzumiwe ku guhagarika ikwirakwira ry’icyorezo cya Covid-19 mbere y’uko rushyirwa ku isoko?”

Uyu mudepite yakomeje agira ati: “Niba atari ko byagenze, mubisobanure mu buryo bwumvikana. Niba ari ko byagenze, mwaba muteganya gusangiza ayo makuru iyi komite? Kandi ndashaka ko mwansubiza mudaciye ku ruhande, yego cyangwa oya kandi ndagitegereje.”

Small yasubije uyu mudepite ati: “Ku bijyanye n’ikibazo cy’uko urukingo rwaba rwarasuzumwe niba ruzahagarika ikwirakwira rya Covid-19 mbere y’uko rujya ku isoko. Oya, haha! Aha, eeeh, murabizi, twagombaga kugendera mu by’ukuri ku muvuduko wa siyansi kugira ngo tumenye ibiri kubera ku isoko.”

Nyuma yo kumva igisubizo cya Small, Depite Roos yifashishije urubuga rwa Twitter kuri uyu wa 11 Ukwakira, atangaza ko kujya ku isoko k’uru rukingo rutarakorewe isuzuma ari amahano kubera ko hari za miliyoni z’abantu bategetswe kwikingiza, ababyanze bavutswa bumwe mu burenganzira.

Yagize ati: “Ibi ni amahano. Za miliyoni z’abantu ku Isi bumvaga bahatirijwe kwikingiza kubera imyumvire ya ‘urabikora ku bw’abandi’. None iki gihindutse ikinyoma. Ibi bigomba gushyirwa hanze.”

Roos yavuze ko iwabo mu Buholandi utarikingizaga yafatwaga nk’igicibwa muri rubanda. Ati: “Nutikingiza, urarwanya abandi. Ibi ni byo Minisitiri w’Intebe w’u Buholandi na Minisitiri w’ubuzima batubwiraga. Ntabwo wikingiza ku bwawe, ahubwo wikingiza ku bw’abandi. Ubikorera sosiyete yose. Uyu munsi bihindutse ikinyoma cyuzuye.”

Depite Roos kandi yatangaje ko iyi komite yatumiye Umuyobozi Nshingwabikorwa wa Pfizer, Albert Bourla, kugira ngo atange ibisobanuro ariko ntiyaboneka. Ngo byavuzwe ko yari yandikiye Umukuru wa komisiyo y’Inteko ya EU, Ursula von der Leyen, ubutumwa bumumenyesha ko atari buboneke, ariko ngo ntibwashyizwe ahagaragara.

Ni aha uyu mudepite yahereye agira ati: “Bwana Bourla ashishikajwe n’inyungu ya za miliyari-amafaranga y’imisoro yishyurwa n’abaturage ba EU ariko ntashishikajwe no kubisobanura. Kuboneka kwe hano ni ingenzi.”

N’ubwo Small yasubije ko urukingo rwa Pfizer rutasuzumwe mbere y’uko rugezwa ku isoko, ruri mu zo byatangajwe ko zizewe cyane kuko rwo rwashyizwe ku kigero cya 91% hashingiwe ku bushakashatsi bw’ibanze bwakozwe n’ikigo cya Leta zunze ubumwe za Amerika gishinzwe kugenzura ubuziranenge bw’imiti n’ibiribwa, FDA.

Tariki ya 4 Mutarama 2021, Bourla yatangaje ko muri Afurika y’Epfo ho, urukingo rwa Pfizer rwizewe 100%. Yagize ati: “Nishimiye kubamenyesha ko isuzuma rigezweho ku cyiciro cya gatatu twakoreye hamwe na BioNTech ryagaragaje ko urukingo rwacu rwa Covid-19 rwizewe 100% mu gukumira ubwandu muri Afurika y’Epfo.”