Ikigo cy’igihugu gishinzwe kurwanya no gukumira indwara, Rwanda CDC n’igishinzwe ubuzima, RBC, byatangaje ko hari umubare muto udateye impungenge w’abantu bakingiwe bagaragayeho icyorezo cya Covid-19.
Nk’uko The New Times yabitangaje, Dr Aimee Geissler uyobora Rwanda CDC yagize ati: “Hari ubwandu bwabonetse mu bantu bahawe ubwoko bwose bw’inkingo ku Isi barimo n’abo mu Rwanda, n’ubwo hari inkingo byagaragaye ku zizewe ku kigero cya 90%, uba ugifite 5% by’abantu bakwandura, bakaba banakwirakwiza iyi ndwara.”
Umuyobozi Mukuru wa RBC, Dr Nsanzimana Sabin yasobanuye ko abanduye barakingiwe ari 4%, bakaba ari abahawe doze imwe y’urukingo, bari bategereje guhabwa iya kabiri.
Dr Nsanzimana kandi yavuze ko abakingiwe bagaragayeho iki cyorezo, nta bimenyetso bagaragaza, ngo nta n’impinduka bagaragaza ku mibiri yabo ku buryo bajyanwa mu bitaro.
Dr Geissler abona kuba hari abanduye iki cyorezo barakingiwe ari ibintu bisanzwe, cyane ko umubare wabo utigeze urenga uteganyijwe. Gusa avuga ko byerekana ko n’uwakingiwe mu buryo bwuzuye akwiye gukomeza gukurikiza ingamba zo kwirinda iki cyorezo.
Yagize ati: “Byerekana impamvu abantu bakwiye gukomeza kubahiriza ingamba zo kwirinda Covid-19. Ufite ibyago byo kwandura n’ubwo waba warahawe doze ebyiri z’urukingo.”
Kuva iki cyorezo cyagera mu Rwanda kugeza kuri uyu wa 13 Kamena 2021, hamaze kwandura 28,373, abakize ni 26,341. Abamaze gukingirwa ni 389,519 barimo 240,659 bahawe doze ebyiri za AstraZeneca.
Kurikira ibiganiro n’amavidewo binyura kuri Bwiza TV
