Malik Obama, mukuru wa Barack Obama wahoze ari Perezida wa Leta Zunze Ubumwe za Amerika, yagereranyije amatora inshuti ye Donald Trump yatsinzwe nk’amatora yabaye iwabo mu gihugu cya Kenya mu 2013, avuga ko yaranzwe n’ibintu bidasanzwe ndetse n’uburiganya.
Nubwo ahuje se na Barack Obama, Malik Obama, ni umufana ukomeye wa Perezida Donald Trump kandi yifuzaga ko umukandida w’Abarepubulikani ari we wegukana intsinzi.
Kuri we, ngo aya matora aheruka muri Amerika yabayemo uburiganya mu nyungu za Joe Biden nk’uko yagiye abigaragaza mu butumwa butandukanye yagiye atambutsa kuri twitter nk’uko tubikesha ikinyamakuru Mwakilishi.
Ati: “Amatora ya 2020 muri Leta Zunze Ubumwe za Amerika ni nk’aya 2013 muri Kenya, Sinigeze mbona nk’ibi muri Leta Zunze Ubumwe za Amerika. Ni nka filime. Ni ubusazi bwuzuye. Ni uburiganya.”
Umukandida w’ishyaka ry’Abademokarate, Joe Biden, yatsinze amatora nyuma yo kurenza amanota 270 yari akenewe kugira ngo abe Perezida wa 46 wa Amerika.
Mu ijambo rye ry’intsinzi, Biden yavuze ko ashaka kongera gushyira hamwe igihugu nubwo bugarijwe n’icyorezo cya Covid-19 n’ihungabana ry’ubukungu n’imibereho.
Mu 2016, nibwo Malik Obama, wari umaze igihe kinini mu ishyaka ry’Abademokarate yahinduye akinjira mu ishyaka ry’Abarepubulikani ndetse agatangaza ko azatora Donald Trump kuko yizera ko uyu “avuga ibimuri ku mutima”.
Icyo gihe yavuze ko “gutenguhwa gukabije” n’ubuyobozi bwa murumuna we Barack Obama byatumye afata icyemezo cyo guhindura ishyaka akajya mu ry’Abarepubulikani.
