Manchester United ni ikipe yabayeho kuva mu 1878 yitirirwa agace ko mu mugi wa Manchester kitwa Newton Heath, ifata iri zina izwiho muri iki gihe mu 1902, ikaba ifite akabyiniriro k’Amashitani Atukura (Red Devils). Tariki ya 6 Gashyantare 1958 ni igihe kitabigarana mu mateka y’iyi kipe iri mu zikize cyane kurusha izindi muri ruhago y’isi. Uyu mwaka washoboraga kuba iherezo ry’iyi kipe gusa ntabwo Imana yabikunze, wenda byari urukundo rwayo yakunze abakunzi bayo icyo gihe n’ubu ngubu.
Kuri iyi tariki, Manchester United yari ivuye ku kibuga cy’indege cya Belgrade muri Serbia, ubwo yari imaze kunganya na Red Star Belgrade (Crvena Zevzeda) ibitego 3-3, bituma ikomeza mu cyiciro gihurikiyeho mu irushanwa rihuza amakipe yo ku mugabane w’Uburayi (European Cup). Indege ya Airspeed AS.57 ya kompanyi ya Ambassador of British Airways yari itwaye abakinnyi n’abayobozi Manchester United, abatwazi n’abashinzwe serivisi yo mu ndege hiyongeyemo abanyamakuru, bose bari bayirimo. 23 muri bo barimo abakinnyi b’iyi kipe 8 bahasize ubuzima, Matt Busby watoje iyi kipe imyaka igera kuri 25 ararokoka. Abakinnyi barokotse iyi mpanuka barimo nyezamu Harry Gregg, Denis Violett na Bobby Charltton, bombi bari ba rutahizamu. Abakinnyi ba Manchester United, abayobozi bayo n’abanyamakuru baturutse muri Belgrade, indege ihagarara i Munich mu Budage kugira ngo ishyirwemo amavuta (kerosene). Yashatse guhaguruka ubugira kabiri biri kunanirana, ubwa gatatu iragenda igonga uruzitiro rw’ikibuga cy’indege maze iragurumana. Manchester United yongeye kwiyubaka, imyaka itanu nyuma y’impanuka ya Munich, itwara igikombe cy’igihugu (FA Cup). Ubu itozwa na Ole Gunnar Solkjaer, ni yo kipe ifite ibikombe byinshi bya Shampiyona (English Premier League), bigera kuri 20. Yatwaye kandi ibya FA Cups 12, Community Shields 21, Champions League 3, Europa League 1 n’ibindi bikombe bitandukanye.
