Kuri uyu wa Kabiri, itariki 20 Kanama, Ikigo Nyafurika gishinzwe kurwanya no gukumira indwara, Africa CDC, cyatangaje ko Repubulika ya Demokarasi ya Congo n’ibindi bihugu muri Afurika, bishobora mu minsi mike, gutangira gukingira indwara y’ubushita bw’inkende.
Iki kigo kivuga ko ikomeje gukorana n’ibihugu birimo icyorezo cy’iyi ndwara ku bijyanye n’ibikoresho n’uburyo bw’itumanaho, kugirango hazabashe gutangwa doze z’inkingo byitezwe ko ziri hafi kuhagera nk’uko byemejwe n’ikigo cy’Umuryango w’Ubumwe bw’u Burayi gikora inkingo, Bavarian Nordic BAVA.
Mu cyumweru gishize nibwo OMS yatangaje ko ubushita bw’inkende ari ikibazo cyihutirwa ku buzima rusange ku isi, ku nshuro ya kabiri mu myaka ibiri, mu gihe ubwoko bushya bw’iyi ndwara, bukwirakwira vuba cyane muri Afurika.
Umuyobozi mukuru wa CDC, muri Afurika, Jean Kaseya yabwiye Ijwi rya Amerika ati: “Ntabwo twatangiye gutanga inkingo. Tuzatangira mu minsi mike, tuzi neza ko ibintu byose biri ku murongo. Mu mpera z’icyumweru gitaha, inkingo zizatangira kugera muri Repuburika ya demokarasi ya Kongo no mu bindi bihugu”.
Kaseya yakomeje agira ati: “Tugomba kumenya neza ko abazaduha inkingo n’ibikoresho biteguye, kugirango zizabashe kubikwa neza kandi zitangwe neza ku bantu bazikeneye.
Yangeyeho ko ubushakashatsi ku mikorere y’inkingo zitandukanye buzakomeza muri Afurika, mu gihe zizaba zirimo gutangwa. Bityo ibihugu bizasobanukirwe neza n’inkingo ziboneye, hakukikijwe uko ibintu bihagaze mu gihugu nyirizina.
Africa CDC yagagaraje ko kuva iyo ndwara itangiye, mu ntangiriro z’uyu mwaka wa 2024, mu bihugu 12 bya Afurika, habonetse abarwayi bagera ku 19.000.
Ni mu gihe mu cyumweru gishize, muri Afurika byatangajwe ko abandi bantu barenga 1.400 banduye indwara y’ubushita bw’inkende.
