Urukiko Rukuru muri Namibia rwatangaje ko amategeko abiri yo mu gihe cy’abakoloni yagiraga icyaha kubana kw’abahuje ibitsina, anyuranyije n’itegeko nshinga .
Kuri uyu wa Gatanu, nibwo Urukiko Rukuru rwa Namibia rwakuyeho amategeko abiri yo mu gihe cy’abakoloni ahana imibonano mpuzabitsina hagati y’abahuje ibitsina, mu cyafashwe nk’intsinzi idasanzwe ku muryango wa LGBTQ +.
Abaharanira uburenganzira bw’ikiremwamuntu bavuga ko, nubwo gukatirwa ari gake, hakomeje ivangura rikorerwa umuryango w’abakundana bahuje ibitsina cyangwa abihinduje igitsina (LGBTQ) kandi bigatuma abagabo bahuje ibitsina babaho batinya gutabwa muri yombi.
Icyo icyemezo gisobanura iki?
Urukiko rwo mu murwa mukuru Windhoek rwanditse ruti: “Icyaha rusange cy’imibonano mpuzabitsina ikorerwa mu kibuno (sodomy) gitangajwe ko kinyuranyije n’amategeko kandi ko kitagifite agaciro.” Yatangaje kandi ko rinyuranyije n’itegeko nshinga itegeko ribuza “ibyaha by’imibonano mpuzabitsina idasanzwe.”
Impirimbanyi yo muri Namibia, Friedel Dausab, niwe wazanye uru rubanza, abifashijwemo n’umuryango utegamiye kuri Leta ukorera mu Bwongereza, Human Dignity Trust.
Avugana n’Ibiro Ntaramakuru by’Abafaransa, AFP, Dausab yagize ati: “Kubera iki cyemezo, sinzongera kumva ko ndi umugizi wa nabi uri mu bwihisho mu gihugu cyanjye kubera gusa uwo ndi we.”
Namibia yarazwe amategeko imaze kubona ubwigenge yasigiwe na Afurika y’Epfo mu 1990, nubwo ibikorwa by’abahuje ibitsina hagati y’abagabo byari byaragizwe icyaha ku butegetsi bwa gikoloni.
Icyaha nticyanditswe ariko cyari icyaha giteganywa n’amategeko rusange y’Abaroma n’u Buholandi, yakurikizwaga mu bihugu byari bikolonijwe n’ubwami bw’u Buholandi.
Kuva icyo gihe, muri Afurika y’Epfo ibikorwa by’imibonano mpuzabitsina y’abahuje ibitsina ntibikiri icyaha kandi ni cyo gihugu cyonyine ku mugabane wa Afurika cyemerera abahuje ibitsina gushyingiranwa, kwinjira mu mashyirahamwe y’abenegihugu, no gushaka abana barera.
