Abantu babiri bapfuye abandi 19 barakomereka nyuma y’uko ubwato burebure bw’igisirikare cyo mu mazi cya Mexique bwo kwitorezaho bwagongaga Ikiraro cya Brooklyn (Brooklyn Bridge) mu mujyi wa New York.
Polisi yavuze ko ubwato bwa Cuauhtémoc, burimo abantu 277 bwatakaje ingufu ku wa Gatandatu ubwo kapiteni yayoboraga ubwo bwato, bituma bwerekeza ku kiraro burakigonga.
Umuturage wa Brooklyn, Nick Corso wabonye iyi mpanuka, yavuze ko ako gace katewe ubwoba. Yatangarije AFP ati: “Hari induru nyinshi, abasare bamwe banagana….”
Umuyobozi w’umujyi wa New York, Eric Adams yemeje kuri X ko abantu babiri bapfuye naho 19 bakomeretse bari bamerewe nabi.
Ikiraro cya Brooklyn ntabwo cyangiritse cyane kandi cyongeye gufungurwa nyuma y’iperereza ry’ibanze.
Ubu bwato bupima metero 91 z’uburebure na metero 12 z’ubugari nk’uko bivugwa n’Igisirikare cyo mu Mazi cya Mexico, bwahagurutse bwa mbere mu 1982.
Buri mwaka, bufata urugendo nyuma y’amasomo y’ishuri rya gisirikare ryo mu mazi hasozwa imyitozo ya ba cadets.
Uyu mwaka, bwavuye ku cyambu cya Acapulco cyo muri Mexique ku itariki ya 6 Mata 2025 bigomba gusoreza urugendo muri Islande.
