Umutoza w’ikipe ya Arsenal, Unai Emery ubwo yari amaze gutsinda ikipe ya Tottenham, yatangaje ko wari umukino wihariye ndetse ko agiye gukora ibirenze ibyo yakoze muri uwo mukino.
Ni umukino wa Shampiyona yo mu Bwongereza, wabaye kuri iki Cyumweru tariki ya 2 Ukuboza 2018, urangira ikipe ya Arsenal inyagiye ibitego bine, kuri bibiri bya Tottenham.
Umukino urangiye, ubwo umutoza Unai Emery abanyamakuru bamubazaga uko yakiriye uyu mukino, yasubije agira ati « Ni intsinzi ikomeye cyane, tweretse ndetse tunaha intsinzi abaterankunga bacu kuko wari umukino wihariye duhanganye na Tottenham, kuri twe, ni umukino wihariye ».
Yakomeje avuga ko ari igihe cye cyo gukora ibirenze, nyuma yo gutsinda ikipe ya Bournemouth ibitego bibiri kuri kimwe, ku mukino wabaye ku wa 25 Ugushyingo, akaba yongeye gutahana intsinzi. Ati « Tugomba gukomeza urugendo rwacu, duharura inzira, ngiye gukora ibirenze ».
Kugeza ubu ikipe ya Arsenal, iri ku mwanya wa kane n’amanota 30, ikaba irushwa inota rimwe na Chelsea iri ku mwanya wa gatatu, mu gihe Man. City iyobore urutonde rwa Shampiyona ifite amanora 38.
