Urubuga rwa YouTube rwamaze gusiba indirimbo ‘Ni Forever’ y’umuhanzi Mugisha Bénjamin ‘The Ben’, nyuma y’iminsi mike ayishyize kuri ruriya rubuga.
Mu cyumweru gishize ni bwo The Ben yari yasohoye iyi ndirimbo yaririmbiye umugore we, Uwicyeza Pamella; mbere gato y’uko aba bombi bakora ubukwe bwabaye mu mpera z’icyumweru gishize.
YouTube yasobanuye ko yasibye iriya ndirimbo nyuma yo kubisabwa n’ikigo cyitwa Drone Skyline Ltd gisanzwe gitanga serivisi zerekeye za drones.
Iki kigo gishinja The Ben gukoresha iriya ndirimbo nta burenganzira cyamuhaye (Copyright).
Yaba The Ben cyangwa Drone Skyline Ltd nta wuragira icyo atangaza ku isibwa ry’iriya ndirimbo.
Ni Forever yasibwe mu gihe yaherukaga kwesa umuhigo wo kuba indirimbo Nyarwanda ya gatatu yarebwe kuri YouTube n’ababarirwa muri miliyoni mu gihe gito.
Ni nyuma ya ‘Why’ The Ben yakoranye na Diamond Platnumz cyo kimwe na ‘My Vow’ Meddy yahimbiye umugore we Mimi Mehfira.
Mu gihe cy’icyumweru Ni Forever yari imaze kuri YouTube, yari imaze kurebwa n’abarenga miliyoni 1.3.
