Ikipe ya Etoile de l’Est yatangaje ko yamaze gutandukana n’abatoza bayo babiri bayifashije kwitwara neza mu cyiciro cya kabiri mu mwaka ushize bakayihesha itike yo gukina icyiciro cya mbere.
Abo ni Banamwana Camarade wari umutoza wa mbere wungirije na Bakundakabo Rachid wari uwa kabiri wungirije basheshe amasezerano bari bafitanye na yo ku bwumvikane.
Ubwo Etoile de l’Est yahaga Camarade amasezerano, yari yabanje gusinya amasezerano yo kungiriza Habimana Sosthène watozaga Etincelles ikaza kumwirukana kubera umusaruro mubi.
Icyo gihe amakuru yavugaga ko Camarade yasabwe n’ubuyobozi bwa Etoile de l’Est kuyifasha gusubira mu cyiciro cya mbere yaherukagamo mu myaka irenga 20, ndetse Camarade yaje kubigeraho afasha iyo kipe isezerera Amagaju nayo yari afite inyota yo kugaruka mu cyiciro cya mbere.
Abakunzi b’umupira w’amaguru batuye i Ngoma babwiye BWIZA ko ubuyobozi bw’iyo kipe bwasabye umutoza Camarade kureka Etincelles yamwifuzaga bakamuha andi masezerano amugira umutoza mukuru wa Etoile de l’Est, binajyanye n’uko nta mpamyabushobozi imwemerera gutoza mu cyiciro cya mbere yari afite.
Icyo gihe ngo bw’iriya kipe y’i Ngoma bwasabye FERWAFA kumwemerera agatoza amezi atatu by’agateganyo, burabyemererwa.
Nyuma y’uko Camarade yitwaye neza mu cyiciro kibanza cya shampiyona ubuyobozi bwa Etoile de l’Est ntibwigeze bushaka umutoza ufite ibyangombwa byo gutoza mu cyiciro cya mbere, bikavugwa ko bari barumvikanye ko azishakira umutoza azungiriza ariko ariko ntagire ijambo ahubwo akaba ariwe uzakomeza gufata ibyemezo .
Amakuru avuga ko ubuyobozi bwumvikanye na Abdou Mbarushimana watozaga Bugesera FC ariko birangira Camarade na komite y’ikipe batabyumvikanyeho, kuko we yifuzaga ko basinyisha Munyankindi Jean Paul wari umaze igihe adatoza.
Etoile de l’Est ngo yagiriye icyizere Camarade kugeza aho bumvaga batandukanye nawe byatuma basubira mu cyiciro cya kabiri.
Impamvu zatumaga badashaka umutoza zirimo igitutu cy’ibitangazamakuru byakomeje kugaragaza Camarade nk’umutoza ukomeye, bikiyongeraho ko yitwaye neza mu mikino y’amakipe akomeye kuko amakipe ayoboye urutonde rwa shampiyona yitwaye neza mu mikino yakinnye nayo uretse Mukura VS na Police FC; ibyatumye abona amanota 16 mu mikino ibanza.
Imikino ine Etoile de l’Est imaze gukina mu mikino yo kwishyura umusaruro uragerwa ku mashyi kuko mu manota 12 yabonyemo inota rimwe kuko yatsinzwe imikino 3 inganya umukino umwe.
Amakuru avuga ko Banamwana Camarade ariwe wahisemo gukorana na Bukaraba Andy umutoza ukomoka muri Repulika iharanira demokarasi ya kongo.
Umwe mu bahaye BWIZA amakuru avuga ko Camarade byavugwaga ko yungirije ariko ko ariwe wafataga ibyemezo bitewe nuko umutoza yazanwe kugirango bayobye uburari, kubera ko Ferwafa yasabaga iyo kipe kugira umutoza ufite licence ya CAF ya B cyangwa A.
Amakuru avuga ko Camarade na Rashid birukanwe biturutse ku gutsindwa na Etincelles FC, ibyazanye umwuka mubi hagati y’abayobozi ba Etoile de l’Est na bariya batoza.
Bijyanye no kuba Camarade ariwe wagiraga uruhare mu gutegura imyitozo no gukora urutonde rw’abakinnyi bari bukine umukino bikiyongeraho ko yigeze kumvikana na Etincelles kuyibera umutoza wungirije ndetse Bakundankabo Rashid akaba ari umutoza wabaye mu karere ka Rubavu, bivugwa ko ubuyobozi butishimiye uburyo batsinzwe na Etincelles ku munsi wa 19 wa shampiyona.
Ni umukino batsinzwe mu gihe mbere yawo n’ubuyobozi bw’ikipe bari babanye neza, ibishingirwaho na benshi bavuga ko ari wo wabirukanishije bikarangira Etoile isigaranwe na Andy Bukaraba.
