Ni iyihe mpamvu Col. Rukunda yateye umugongo ingabo za Congo?

Guhera ku wa 8 Mutarama 2020, amakuru yacicikanye avuga ko yitandukanyije n’ingabo za leta ya Congo (FARDC), impamvu yabimuteye ntiyavugwaho rumwe n’ abantu batandukanye. Uretse amakuru yo kwitandukanya na FARDC, bamwe bise gutoroka yatangajwe n’iki gisirikare cy’igihugu ku rubuga rwa Twitter, andi yose yavuzwe nta gihamya afite.

Hari abavuze ko yaba yaragiye kwihuza no kuyobora umutwe wa Gumino, mu gihe abandi bavuga ko yaba yaragiye gutabara abo mumuryango wa bene wabo bamaze amezi bugarijwe n’ibitero bya Mai Mai ya Gen. Maj. Yakutumba.

Nk’uko byagaragajwe n’abasomyi benshi b’inkuru zamwanditseho, ibyo kuba yaragiye mu mutwe urwanya Leta y’u Rwanda, cyangwa kuyoboka undi mutwe urengera Abanyamulenge, byose ni ugushakisha ( speculation) kuko nta kibihamya gihari, usibye igisirikare cya Congo cyemeje ko uwo musirikare mukuru yatorotse.

Ibyo kuba Gumino yifatanya n’abarwanya leta y’u Rwanda byagaragaye muri raporo y’impuguke z’akanama gashinzwe umutekano muri ONU, nimero S/2018/1133 dufitiye kopi, Col. Makanika akaba atavugwa muri iyo raporo.

Abasomyi bavuga ko kwitandukanya na FARDC kwa Col. Rukunda kugira ngo ajye mu mutwe w’abarwanya leta y’u Rwanda bitaba bimushishikaje kurusha gutabara ababyeyi be n’abavandimwe b’Abanyamulenge bamaze igihe bicwa, basahurwa, batwikirwa, abandi bahunga.

Urebye mu mateka, intego za FRF [itakibaho] na Gumino, kwari ukurwanirira inyungu z’Abanyamulenge. N’ubu ngo ni ko bikimeze ku mutwe wa Gumino kuko uhangana na Mai Mai Yakutumba.

Mu gihe twateguraga iyi nkuru, hari amakuru atugezeho avuga ko uyu mutwe wa Mai Mai udatinya gutangaza ku mugaragaro ko Abanyamulenge bagomba kwicwa, wongeye kugaba ibitero muri Minembwe kuva mu masaa kumi y’igicuku. Aya makuru aturukayo avuga ko uduce twa Mpugamo, Kivumu, Rubanda na Musingi twatewe, insisiro zimwe zikaba zirimo gushya ku buryo umutangabuhamya wemeje aya makuru avuga ko yabonaga imyotsi icumba no kumva urusaku rw’ amasasu ariko akavuga ko bigoye kumenya umubare w’ ingo zatwitswe, inkomere n’abapfuye.

Ibyo kubura imirwano byongeye kwamaganwa n’abanyapolitiki ndetse n’abandi baturage barimo umudepite w’umunyamulenge Me Moise Nyarugabo, mu gihe hari hamaze iminsi hari agahenge.

N’ubwo Col. Rukunda ntacyo aratangaza ku bimuvugwaho, ibitekerezo by’abaturage bihuriweho byerekana ko yaba yaritandukanyije na FARDC kuko itigeze igira uruhare mu kugarura amahoro i Mulenge, ari nabyo byamuteye kwihagurukira, akajya gufasha Abanyamulenge basa n’abatereranwe. Iyi ngingo abasomyi bayigarutseho, aho bagaragaza ko FARDC ishobora kuba ari yo mwanzi w’Abanyamulenge.

Col. Rukunda ubu wamaze kuba umwanzi wa RD Congo nk’uko FARDC yabitangaje, abaye yihuje n’abagambiriye guhungabanya umutekano w’u Rwanda, cyaba ari ikibazo gikomeye. Ku rundi ruhande byaba ari ubutwari bukomeye kabone n’iyo yaba igitambo, mu gihe yaba yateye umugongo FARDC, agiye gutabara no kurengera bene wabo i Mulenge, nk’uko byagarutsweho mu bitekerezo.

Kubera ko nyiri ubwite ntacyo aratangaza, abantu bakagombye gucisha make kuko hakagombye gutekereza ko umutima wo kurengera ubwoko bwe yabiharaniye na mbere y’uko yinjira mu gisirikari cya Leta, bikaba bishoboka ko iyo ngengabitekerezo (ideology) ikimurimo ikaba ariyo yamuteye gutoroka. Igikorwa abenshi mu banyamulenge bashima bakumva n’abandi basirikari n’abapolisi bakuru n’abato bagombye kwigana maze ubwoko bwabo bukarengerwa.

Abanyamulenge bashoboye kwinjira mu nzego zitandukanye za DRC haba muri politiki haba ndetse no mu nzego z’umutekano, kuko bafite abaminisitiri, abadepite, abasirikari n’abapolisi bari ku rwego rwa Gen. Col, Lt. Col, Maj. n’ abandi benshi bato.

Abanyamulenge bo hirya no hino ku isi bakaba barakajwe bikomeye n’icyo bise ipfobya ry’igikorwa Makanika yakoze bo bafata ko ari icy’ubutwari bukomeye.